Remelluri izeneko Arabako bodegak eskatu zion Joseba Olalderi mahastiei buruzko lan bat egiteko. Bertako lursailetan argazkiak ateratzen aurrera eta atzera ibili behar izan zuenez, argazki sorta bikaina atera eta erakusketa antolatzea erabaki zuen. Erakusketa ez da Euskal Herriko mahastien adierazgarri fidela, Bastida herriko eta Remelluriko lursailetan soilik atera baititu argazkiok.

Sarea, piramidea, Kristo aurreko zirko erromatarra, alfonbra, itsasoaren erdian uharte bat lauzpabost bat zuhaitzekin... 50 argazkiren aurrean ordu erdiz begira egon eta honelako sentsazioak eragin ditu Joseba Olalderen erakusketak. Berez, argazkietan ikus daitekeena bestelakoa da: mahatsa, mahatsondoa, mahastiak, bodegak... Ardoaren aurrekariak diren elementu horiei kolorea, argia, eguzkia, distantzia eta adibidez, enkuadraketa gehitzen badiegu ordea, emaitza bestelakoa da; anitza. Hala esan digu Olalde gasteiztarrak: "Zuk begiratu argazkiak eta horiek sortzen dizuten sentsazioa, hori da nik nahi dudana. Mahastiak eta mahatsondoak hor daude, nik irudi autonomoak atera ditut eta emaitza estetiko jakin batzuk lortu nahi izan ditut. Argazki hauetan ez dago muntaiarik, errealitate aberatsak berak eman dit estetika berezi hau lortzeko aukera".

"Zikloak" jarri dio lanari izen gisa eta 50 argazkiak mahatsaren ziklo naturalaren arabera ordenatuta daude. Heriotzatik heriotzara, zuritik zurira. Mahasti elurtua da lehen argazkia eta baita azkena ere. Bi zurien arteko 48 argazkietan denetarik; hostoaren berdea, gorria edo hori puntua, lurraren gorritasuna, egunsentiaren distira, ilunabarra...

Iazko urtarrilean hasi zen Remelluriko lursailetan, mahastietan argazkiak ateratzen eta garai hartan, nahiz eta oso denbora gutxian irauten duen, mahastiak elurtuta harrapatu zituen. Mantu zuriaren azpian estalitako mahastiak bigarren argazkitik aurrera beren aurpegia erakutsiko dute, beti ere triste antzean. Ez da ageri hostorik, ez alerik. Mahatsondoaren adar okerrak bistan, eta lur gorria.

Mahastiek eta baita mahatsondoek ere triste jarraitzen dute, baina paisajeak, naturak, noiznahi bere edertasuna agerian uzten du; behe lainoaren bisita dute mahatsondoek. Behe lainoak ihes egin duenean kolore berriak ageri dira argazkietan. "Alfonbran" edo "sarean" berde kolorea nagusitu da eguzkiak indar gehiago du eta udaberriarekin batera lursailak indartu dira. Mahatsondo zaharrak eta berriak ere tartekatuta ikusiko ditugu. Segidako irudi batean Olalde argazkilaria helikopterotik argazkiak ateratzen aritu dela dirudi, baina berak gezurtatu du hori. Aldameneko mendixka batera igo eta mahastien lerro paralelo anitz fotografiatu du. "2" zenbakia deitzen den argazkia ere topatuko dugu. Egia esan, "2" zenbakia Olaldek berak deitzen dio, baina irudia begiratu besterik ez dago. Mahatsondoak inguratzen dituzten belar sortek 2 zenbakiaren itxura hartzen dute, urrunetik begiratuta bederen.

Mahatsondoak lerro paraleloetan eta lursail lauetan ikusi ohi dira Errioxa, Nafarroa eta Arabar Errioxan. Mahasti oro ez dago ordea berdinean, Toloño mendi barreneko mahastiak aldapan ere badaude eta 600 metrotik gora hazten da mahatsa. Altuera honetako paisajea ere berezia da eta berak eskaintzen dituen irudi eta formak ere bai.

edo "zirko erromatarra" dugu hurrengo, begi bistan. Ez da ikusten ez harritzarrik ezta haurrez jositako aulkirik ere. Oinarria lurra da eta eserita daudenak mahatsondo gaztetxoak dira, berde-berdeak. Segidan argazki "pixelatua"ren istorioa kontatu digu Joseba Olaldek. Zenbat eta urrunago joan "pixelez osatutako irudia dirudi, puntuak besterik ez dira". Gerturatu eta noski, puntu bakoitza mahatsondo bat da. Begira dagoenak erabaki dezala zer ikusten duen... Elurtutako mahastia aspaldi utzi dugu atzean eta urtaroek aurrera egin dutenez, mahats aleak jaiotzen ari dira. Mahats ale esnatu berrietan ihintzaren hezetasuna nabari da... Eta goizaldeko eguzki izpietatik bodega zulora. Adituek mahatsa puntuan dagoela erabaki dute eta kupelak betetzeko garaia heldu da. Lehen eta azken aldiz barruko argazki gutxi batzuk erakusketan. Kupelek estetikarako aukera eskaini diote Olalderi: "Bata bestearen segidan dauden kupel horiek ikusi nituenean piramidea zela pentsatu nuen". Kupel arteko pare bat argazki eta berriro egun argira. Mahastietako beste protagonistak patxadaz eserita; Oportoko langile taldea. Hauek ere beren zikloa daukate. Italian aritu dira lanean, Euskal Herrian patata bilketan ere bai eta Bastidako lanak amaituta etxerantz abiatuko dira bertako mahats uzta jasotzera. Atsedena hartu eta berriro lanera. Hostoaren berdea eta gorria nahasian dira eta lur koloreak ere hor dirau. 50. argazkira hurbiltzen ari gara eta horrek esan nahi du negua gainean dugula. Koloreak apaltzen doaz eta akordatzerako mahastia zuri geratu da.