Madrileko Getafeko ospitalean geriatrian espezialista den Francisco Guillen doktoreak esandakoaren arabera, 65 urte baino gehiago dituzten pertsonen laurdenak hiperkolesterolemia edukiko du datozen urteotan, kolesterol-maila altua odolean alegia. Eta 8,5 milioi pertsona izango dira Espainian kolektibo hori osatuko dutenak.

Espezialistaren arabera garrantzi handikoa da garaiz egindako prebentzioa, eta baita ariketa fisikoa modu jarraian eta arautuan egiteko ohitura ere, hiperkolesterolemiari aurre egiteko. Adibide zehatz bat jartzeko, eguneroko paseotxoa, adineko pertsonen % 30 inguruk egiten dutena. Guillenen hitzetan, "bizitza osoan jarduera fisikoren bat egiten duena da hain zuzen ere bizitzako azken urte horietan igurikapenik gehien eta bizi-kalitaterik onena duena".

Bestalde, medikuak esan du Espainiako panorama sanitarioa eta soziala asko aldatu dela, adineko jendearen gehikuntza dela medio: 65 urtetik gorako pertsonak 7 milioi dira, eta beste 1,5 milioi dira 80 urte baino gehiago dituztenak. Eta kolektibo horrek zuzen-zuzenean jasaten ditu arteriosklerosiaren arrisku-faktoreak (kolesterolaren maila altuak berebiziko garrantzia du hemen). Dena den, diabetea, hipertentsioa (adineko pertsonen artean 5,5 milioi hipertentsoak dira) eta hiperkolesterolemia gehiago kontrolatu behar lirateke adin-tarte horretan.