Argia astekaria webgunearen hasiera

Euskal Herriko haur askoren antzera, zazpi urterekin egin zituen lehenengo dantza urratsak. Orduko hartan Betti Betelu zuen irakasle, Beskoitzeko Oinak Arin taldean, eta talde honi zuzenki lotuta ulertu behar da bere ibilbidearen jatorria. Dantzari moduan jarduten zuela, Juan Antonio Urbeltzekin lehenengo hartu-emanak izan zituen, eta berarekin ikasi zituen, batez ere, dantzaren izaera eta historiari buruzko xehetasunak.
Ikuskizunaren mundura, lehenengo aldiz, Juan Antonio Urbeltzen eskutik heldu zen. 86 eta 87 urteen artean, "Zortziko" eta "Alakiketan" ikuskizunetan parte hartu zuen dantzari bezala; baina horrez gain, Iparraldetik heldu ziren dantzariak prestatzeko ardura ere izan zuen. 1991n, aldiz, Oinak Arin taldearekin bere lehenengo ikuskizuna sortu zuen. Haurrekin burututako lana zen "Xirula Mirula" izeneko hura, eta hiru urteko jarraia izan zuen eszenatokietan. 1997an, berriro ere, esperientzia errepikatu zuen. Sormen lan horrek "Istorio Mistorio" zuen izena, haurrekin egindakoa zen baita ere, eta Clauden garapen artistikoaren erakusle garbia izan zen. Urte horietan zehar, baita ere, Suitzan jardun zuen, eta bertako Nomad dantza garaikideko konpainiarekin eta Iparraldeko zenbait musikarirekin dantza garaikidea eta tradizionala uztartuz ikuskizun berri bat sortu zuen. Irailaren 17an aurkeztutako "Ingura Mingura" saiakera berri bat da. Clauden moduan, etorkizunari begiratzen dion ahalegina da. Izan ere, ikuskizun berrien ameslaria da maisu-koreografo-dantzari lapurtarra