Argia astekaria webgunearen hasiera

Orain dela 6-7 urte Ordiziako Gaztetxean irrati emisora bat abian zen, baina Gaztetxea bera erre zenetik jarduera haiek bertan behera utzi behar izan zituzten.
Orain, Ordiziako Gazte Asanblada irratia birmuntatzeko asmotan dabil, eta horretarako dirua biltzeko kanpaina bati ekin dio, bere arduradunetako bat den Aitor Gartziak adierazi digun bezala: "Beste ekintza bat bezala planteatzen dugu; oso ongi funtzionatzen zuen eta berriz ere emititzen ikusi nahi dugu".
Asmo hori egi bihurtzeko, besteak beste, kamisetak saldu, herrian bideo emanaldiak eta bestelako ekintzak eskaini eta kontu korronte bat ere jarri dute: Gipuzkoa Donostia Kutxako 2101 0019 51 0123 05 85 6.2.
Gazte hauek 200.000 pezeta behar dituzte ekimenari aurre egin ahal izateko: "Goierri osoan entzunak izatea ahalbidetuko digun emisora erosi nahi dugu, baina ez dugu berau lortzeko eperik jarri, lortzen denean lortuko dugu eta kitto" azaldu digu Aitorrek.
Momentuz ez dute horren ondorengo urratsik antolatua: "lehenengo lehenengoa", baina Gazte Asanbladan bertan 100 bat gaztek parte hartzen dutela eta Gaztetxeak dagoeneko 14 urte bete dituela aitortzen digu, beraz ez dirudi esatari eta azpiegitura aldetik arazo handirik izango dutenik: "programazioa asanbladakoen artean banatuko litzateke; pertsona batzuek musika landuz, beste batzuek politika, hurrengoek, berriz, gazteon arazoak...".
Hori bai, nahiz eta programazioa oraindik zehazturik ez izan, hizkuntza nagusia, zalantzarik gabe, euskara izango dela aurreratzen digu.