Argia astekaria webgunearen hasiera

Jesus Altunaren ekarpena, euskal Arkeologia eta Historiaurre alorrean, hiru atal nagusitan sailkatu daiteke. Batetik, ikasketa arkeozoologikoen (geruza arkeologikoetan berreskuratzen diren sanimalien hezurren azterketa) sortzailetariko bat dugu, Iberiar Penintsula mailan. Azterketa hauek, aurreko garaietako baldintza klimatikoak, zein gizaki prehistorikoen ohitura sozioekonomikoak nolakoak ziren aztertzeko nahitaezkoak dira. Bere zaletasun zientifikoen artean, Arkeozoologiarekikoa da aipagarriena.
Bigarren atala talde prehistorikoek eginiko artea, bereziki labarretakoa, litzateke. Ekain eta Altxerriko kobazuloei buruz argitaratutako monografiek bi aztarnategi hauek mendebal Europan dagokien testuinguruan kokatzen dute. Zeresanik ez, horrenbeste urteetan amestutako Ekaingo erreplikaren proiektua bere laguntza teknikoari esker mamituko da, epe laburrean.
Bukatzeko, Altunaren eragina bereziki garrantzizkoa da egungo Gipuzkoako Arkeologiaren egoera ulertu ahal izateko. On Joxe Miel Barandiaranen eskutik Lezetxiki eta Aitzbitarte IVan lanari ekin ondoren, beste hainbat lekutan (Ekain, Torre, Erralla, Amalda edo Aitzbitarte IIIan, besteak beste) aritu da, landa lanetan. Gipuzkoako Ondare Arkeologikoaren bildumaketa (Aranzadi Zientzi Elkarteak aurrera eramanda) bere zuzendaritzapean egin da, 1982tik hona. Bere hurbiltasunean lan egin duten hainbat ikerlarien Doktorego Tesiak, Gipuzkoari buruzko ezaguera arkeologikoa eraberritu dute, azken bi hamarkadetan. Azken finean, eta bi lerrotan laburbiltzea zaila izan arren, zientzia gizon honen eragina zeharo oinarrizkoa da, egun Gipuzkoa eta Euskal Herriko Historiaurreaz idazteko