Argia astekaria webgunearen hasiera

Europan tentsioa areagotzen", horrela dio lan arloan gihar eta hezurretan sortzen diren lesio ugarien aurka Europako sindikatuak duela gutxi bultzatzen hasi diren kanpainak. Besteak beste, horrelako arazoak enpresa eta sektoreen negoziaketetan erabateko presentzia izatea da helburua. Gaixotasun profesionalen zerrenda berraztertu eta gihar eta hezurretako gaixotasun mota ezberdinak bertan agertaraztea eta lanerako makineria eta lan ekipamenduen taxuketa hobetzeko arau tekniko ergonomikoen multzo koherentea osatzea ere kanpainaren helburuen artean daude.
Laneko Baldintzak Hobetzeko Dublineko Fundazioaren arabera, langileen %30ak bizkarreko mina duela dio eta %17ak giharretakoa. Gihar eta hezurretako lesioak Europan maiztasun handiena duten hamar gaixotasun profesionalen artean daude. Horrelako gaixotasunek geroz eta langile gehiagori eragiten diete, eta eginkizun eta jarduera multzo oso zabala hartzen dute, bai zerbitzuetan (pantailekin aritzen diren lanetan, osasun sektorean, eta abar) eta bai garbiketan, nekazaritzako elikagaien industrian, ehungintzan, mekanikan eta eraikuntzan. Halako lesio gehienak emakumeek nozitzen dituzte.
Zer dira gihar eta hezurretako lesioak? Lana antolatzeko modu berriek lesio mota ugariren izurritea eragin dute, eta horiek gihar eta hezurretako lesioen multzoan sartu dira. Gaur egun lan osasunaren arazo nagusietakoak bihurtu dira. Bizkarraldea, tendoiak, giharrak, nerbioak, zirkulazioak, goialdeko gorputz adarretako giltzadurak (ukondoak, eskumuturrak, eskuak, sorbaldak) eta lepaldea dira lesio gehien izaten dituztenak. Gaixotasun kronikoak edo ebakuntza kirurgikoa behar duten gaitz sakonak ere sor ditzakete.
Lesio horiek eragile ugariren ondorio dira, sarritan bat baino gehiago batera, eta lanaren antolamenduarekin zerikusi zuzena izan ohi dute: hainbat lanetan egin beharreko indarra bezalako eragile fisikoak, mugimenduen errepikapena eta maiztasuna, laneko jarrera ezerosoak, dardarak, estresa bezalako eragile psikosozialak, prestakuntza gabezia, ordutegiaren zorroztasuna eta abar