Argia astekaria webgunearen hasiera

Hiru urtetan egin diren auzolandegiei esker agertu eta berreskuratu dira pixkanaka Igartzako orubeko elementu ezberdinak. 1994an errotaren garbiketa eta sendotze lanak egin ziren. 1995ean Belengo Andre Mariaren Ermitaren berreskurapena burutu zen. 1996an Igartzako Jauregiko garbiketa eta berreskurapena egin zen. Jauregia, berreskuratze lanen aurretik, inguruko beste baserrien antzekoa zen. Bertako patioan etxolak eta animaliak zebiltzan nonahi. Txukundu behar izan zen guztia, baliorik ez zuena botaz eta ezkutaturik zegoen hainbat ezaugarri agertaraziz.
Igartzako jauregiaren aurretik zegoen dorretxea Enrike IV.aren aginduz desagertu zen. Hasierako indusketetan Jauregiaren lehen solairua dorretxearena zela uste izan zen. Eginiko lanen ondorioz jakin da ordea, jauregiaren bi solairuak garai berekoak direla. Jakin badakigu dorretxea zubiaren inguruan zegoela, baina oraindik ez da haren arrastorik topatu.
Igartzako Jauregia egun Beasaingo Udalaren ardurapean dago. Iazko urtetik bertan bisitaldi gidatuak egin ahal dira. Jauregia eta errota ikusi eta hauen historia ezagutzeko aukera izateaz gain, diaporama bat dago martxan. Azken honetan Igartzako eta inguruetako historiaren berri ematen da, bederatzi proiektoreren bitartez. Horretarako ordutegi finkoa dago: ostiralean 17:00etan euskaraz eta 18:30etan gazteleraz , eta jai egun eta asteburuetan, 11:00etan eta 17:00etan euskaraz eta 12:30etan eta 18:30etan gazteleraz.
Horrez gain, badago hainbat asmo: batetik, errota martxan jarri nahi dute berriro. Bestetik, dirulaguntzen zain, jauregiaren bigarren solairua berreskuratzeko asmoa dago, egun oraindik ezin baita hau bisitatu. Eta azaroan Museologia Kongresua egingo da Igartzako gunean