Pertsona haserrekorrak kolesterol-maila altuagoak edukitzeko joera dutela frogatu dute Estatu Batuetako ikerlariek.

Oraintsu amaitu berria den ikerketa batek, Estatu Batuetako Bihotz, Birika eta Odoletako Institutu Nazionalak sustatu eta diruz finantzatuak, datu berriak eskaini dizkigu pertsonen izaera zakarra odoleko kolesterol-maila altuekin lotzen dela egiaztatzeko. Izan ere, gure izaerak hein batean geneek determinatzen dutena, eta hezkuntzak eta ingurune sozialak beste alde batetik, eragin zuzena dauka kolesterol-mailan, ikerketa horrek erakusten duenez.

Duke University Medical Center-en egindako ikerketaren emaitza lehendik ere argitaratutako beste batzuen bidetik dator: pertsona suminkorrak, urduriak, lehiakorrak, edo besteenganako erasokorrak direnen portaerak LDL kolesterola (alegia kolesterol txarra) odolean gehitzeko arrisku handiagoa dakar. Beraz, haserrekorren talde horrek infartu bat jasateko arrisku handiagoa edukiko luke, berez lasaiak eta baketsuak direnek baino.

Azken urteotan Friedman eta Roseman ikertzaile iparramerikarrek A jokabide-patroia bezala definitu dute pertsona hiperaktibo horiena, beti denbora faltan dabiltzan horiena, arrisku koronarioko joera handikoa bezala. Nortasun mota hori, beti estresera bidean, berez ez da arrisku faktorea, baina bai osasunaren ikuspegitik kontuz ibili beharrekoa