Kanpoan irabazian" udaberri honetan makina bat aldiz entzundako esaera da. Belarra garrantzitsuena duen baserritarrarentzako luxua da bai eguneroko euri hau. Baina baratzeko tomate landare berri bero-goseei, burutu ezinik dauden azaroko ilgoran landatutako baratzuriak gorrinak noiz jo zain beldur denari edo, neurea bezala, baserriari teilatua eman ezinik dabilenari berdearen irabazi eta irabazi galantak grazi gutxi!

Eguraldi honek, eguraldia izaki, pozak eta tristurak banatzen ditu, baina denak lanez jantziak. Belarretan gustura ari da bai jendea. Baita gerria bezala burua makur irabazi kaskarra duten baratzeko landareen jorran. Urteko egun luzeenak diren hauetan eguzkia gertuxeago nahi da. Tomateak, alberjiniak, piperrak, lekak, patatak, tipulak, berakatzak, eta baratzea sasoi onenean dagoen garai honetako apopiloek bero punttu bat hartuko lukete jo eta lurrean bapo dagoen ura ustiatuz pujatu eta aldamenekoa baino ederrago direla adierazteko. Hezetasun honekin gaitzek bai joko dituzte eta etsaia barrez, eder. Barrabasak edo txomin-belarrak eta haren koadrilakoak gustura hazten ari dira bai ahuldu horien artean eta tristurako lana baratzezainarentzako, haitzurra hartu eta saratu, galtzaratu edo jorratu. Jorratu eta jorratu