Espainia da Europako herrialde bakarra lau kate lehia bizian dituena audientzia eskuratzeko: TVE, Tele 5, Antena 3 eta telebista autonomikoak. Azken boladan gainera, bi plataforma digital eta lurraldeko Quiero TV gehitu behar dira. Tele 5en "Anaia nagusia"ren etorrerak gainera, bazterrak harrotu ditu, orain arte lehena izan den TVEri lidergoa kenduz eta hirugarren dagoen Antena 3 krisialdian murgilaraziz.

Publizitate irabazi handiagoak dituzten arren, kate pribatuak kexu dira kate publikoek, finantziazio bikoitza edukitzean (publizitatea eta diru laguntzak), aukera handiagoa dutelako saioak aiseago erosi eta ekoizteko. Konkurrentzia zintzoagoa balitz, telebista kateen edukien maila nabarmen hobetuko litzatekeela diote adituek.

Espainian dagoen kasurik antzekoena Alemanian dugu. Bertan ez dago "prime time"n besteen gainetik gailenduko den katerik; RTL pribatua eta ARD publikoa dira ikusle gehien dituztenak, nahiz eta ez batak ez besteak ez duten pantaila kuotaren %15etik gora atxikitzen.

Gainontzean, bi kate dira nagusi herrialde bakoitzean: Frantzian TF1 da kate ikusiena, France 2k oso atzetik jarraitzen diola; Italian Rai Uno eta Canale 5 parekatuak dabiltza; Britainia Handian aldiz, ITV kate komertziala BBC baino hiru puntu gainetik dabil; Holandan RTL4 eta Ned2, eta Portugalen ostera, SIC katea RTP1 baino askoz gorago dago.

Telebista gehien ikusten duen herrialdeari dagokionez, Hungaria da zaletuena; hungariarrek batez beste 232 minutu ematen dituzte telebistari so egunero. Ondoren Grezia dator 227 minuturekin, Italia (225), Turkia (222) eta Espainia 213rekin. Gutxien ikusten dutenak berriz, austriarrak eta alemanez mintzo diren suitzarrak dira, 137 minutu baino ez. Dena den, pantaila aitzinean denbora gehien ematen dutenak mexikarrak dira, 262 minuturekin egunero. Espainian, jubilatuak dira telebista zaletuenak, batez beste 339 minutu eskaintzen diote-eta. Helduak dira hurrenak 288 minuturekin. Gurasoen etxetik kanpo bizi diren gazteek ordea, 192 minutu baizik ez dute igarotzen telebista aurrean. Seme-alaba gazteak dituzten bikoteek ere ez dute telebista etxeko altzari "kutuntzat"