Argia astekaria webgunearen hasiera

Martin McGuinness, Sinn Feineko buruzagi eta Ipar Irlandako hezkuntza ministroa: "Ezinbestekoa da hauxe sinestea: elkarrizketaren eta alaketaren bidez, arma guztiak Irlandako politikagintzatik at utz ditzakegula".
PPko Carlos Iturgaitz: "Dei diezaietela (EAJkoek) ETAko beren lagunei, haiek emango baitizkiete Buesa jauna eta bere bizkarzain Jorge Diezen erahilketaren berri zehatzak".
Jaime Mayor Oreja: "PP behin ere ez litzateke Benegasek EHrekin aurreikusten duen bilera horretan eseriko. Ezin daiteke egon biolentzia gaitsezten ez duen talde batekin".
Odon Elorza, Donostiako alkatea eta PSE-EEkoa: "EAJ, EA eta PSE-EE erdibidera itzultzen ari dira".
Jean Espilondo, Frantziako Alderdi Sozialistaren diputatua: "Aspaldian abisatu ditut herritar eta hautetsiak ez daitezen bihozberak izan abertzaleen aldarrikapen politikoen aurrean".
Nicolas Redondo Terreros: "Ez da ezer izango Konstituzioa eta Estatutotik kanpo".

Esther Agirre auziperatzeko nahiko datu ez dagoela ebatsi berri du Espainiako Auzitegi Gorenak eta EHko parlamentaria ikertzen zuen txostena itzuli dio Entzutegi Nazionaleko Baltasar Garzon epaileari.
Juan Maria Atutxa Eusko Legebiltzarreko Lehendakariak jakitera eman duenez, iazko abenduan Jaime Mayor Orejak ETAren dokumentazioan ageri zela esateko deitu zion, baina barne ministroak ez zuela informazio hau Barne Kontseilaritza Sailaren esku utzi.
Maria San Gil Donostiako zinegotzi popularra izango da Gipuzkoako PPko lehendakaritzan Ricardo Hueso ordezkatuko duena.

GIPUZKOAKO Batzar Nagusietan 2003. urtetik aurrera A-8 autopistak bidesaririk ez izatearen eskaerak ekaitza ekarri du Diputazioko EAJ eta EAko agintarien, eta EHren artean. Eskaera PP, PSE-EE eta EHren botoekin atera zen aurrera. Roman Sudupek traizioa leporatu dio EHri, eta honek ukatu egin du. Gaia garrantzi handikoa izan arren, honen atzean dira une politikoaren goritasuna eta, funtsean, Diputazioko gobernuak EHrenganako duen menpekotasuna. Alegia, batzuetan EHk irentsi behar duela eta beste batzuetan EAJk eta EAk. A-8aren erabiltzaileengan behintzat ez da haserrerik izango, hori seguru.

BIOLENTZIAREN inguruko gaiak, Eusko Jaurlaritzaren egonkortasuna eta berau sostengatzen duten alderdi abertzaleen arteko akordioen gainean oinarritu da Eusko Legebiltzarra Juan Jose Ibarretxe lehendakariaren agintaldian. Egindako 49 osoko bilkuretatik, 10etan barrik ez dira jorratu aipatutako alorrekin zerikusirik duten gaiak. Aipatutako hiru alorrei dagokienez, 23 proposizioetatik 19 oposizioak aurkeztu zituen, eta gobernuari egindako 60 galderetatik 45 lehendakariari zuzendutakoak izan dira eta beste 15 Baltzari.

HONDARRIBIKO Borja Jauregi alkateak galdaketa egitea proposatu du alardearen auzia behin betiko ebasteko. Herriak zer-nolako alardea nahi duen argitua geldituko litzateke hartara. Juana Mugarrietakoa eta Jaizkibel Konpainiako kideek, berriz, ez dute erreferenduma bidezko jotzen, emakumeak alardean partehartzea berezko eskubidea baita beren ustez. Hondarribiko alardearen jabe den Alarde Fundazioa eta aurreko bi kolektiboak negoziatzen ari izan dira alardearen auzia bideratzeko. Harremanak, ordea, uneon etenda daude.

PRESOEKIKO Solidarioak taldeetako kide batek Espainiako Tele5 telebista kateko "Anaia Nagusia" saioan sartzea lortu zuen eta euskal presoen aldeko aldarrikapenak egin zituen bertan. Espainiako telebista kateek eta komunikabide gehienek albistea isilarazi bazuten ere, Euskal Herrikoen artean eta bereziki Interneten izan zuen oihartzuna.

BERTA Abelleira PPko Ermuko zinegotzi ohiak, egun Ermuko PPko zinegotzi den Jose Maria Cordoni heriotz mehatxuak egin zizkion iragan azaroan, ETAk su-etena hautsiaz bat. Cordonek salaketa jarri ondoren eta Ertzaintzak zegokion ikerketari ekin eta gero, mehatxuak Abelleira zinegotziaren telefono mugikorretik eginak zirela argitu zen, "Ardi beltza" ikerketa aldizkariak bere azken zenbakiko erreportaje batean argitaratu duenez.