Argia astekaria webgunearen hasiera

AEK-k duela hamabost urte ekin zion bideari Balmasedan. Ikasturte honetan 130 ikasle dituzte, hamahiru talde eta bost irakasle daude denera. Urrats guztiak eskaintzen dituzte eta hauez gain, EGA eta hizkuntz eskakizunak prestatzen dituzte. Hainbat leku aldaketa izan ondoren, Zallan dute egoitza nagusia eta Balmasedan hainbat ikasgela solte. Balmasedako ikastolan AEK-k gurasoei ematen dizkie klaseak astean lau orduz. Bost talde daude bertan, 55 pertsona denera, eta gehienak lehenengo urratsetan ari dira, seme-alabekin euskaraz jardutearren. Bestela, beste bi talde dituzte egunero bi orduz euskara ikasten ari direnak.
Ikasle gehienak gurasoak eta langileak dira; gazteak, oro har, gero eta euskaldunagoak dira, B eta D ereduetan ikasten baitute. Orain bi urte Mintzalaguna proiektua jarri zuten abian, euskararen erabilera sustatzearren. Horrezaz gainera, Berbetanek eta beste elkarteek antolatutako ekitaldietan parte hartzen dute.

Enkarterri mailan aritzen den Udal Euskaltegiak duela hamahiru urte ekin zion bideari. Batez beste 150 bat ikasle aritzen dira euskara ikasten urtero, eta gehientsuenak goi urratsetan ematen dute izena. Irakasle lanetan, aldiz, sei pertsona daude. Datu adierazgarria da 40 lagun daudela EGA prestatzen aurten. Euskaltegiaren hastapenetan, beheko mailetan zeuden ikasle gehienak, eta batzuk ez zekiten ezer euskaraz. Euskaltegiko arduradunek esan digutenez, egun euskaltegira hurbiltzen den pertsona orok badaki euskaraz pixka bat, Enkarterrin euskarak izandako bilakaera positiboaren adierazle dena.
Balmaseda, Zalla eta Sodupen ditu egoitzak Udal Euskaltegiak, baina prest leudeke Karrantzan eta Gordexolan, esaterako, etorkizunean egoitzak zabaltzeko.
Klase ordutatik kanpo ekitaldi ugari antolatzen dute, ikasleen formazioaren osagarri. Bisitaldiak egiten dituzte komunikabide, museo, herri euskaldun eta beste hainbat lekutara. Asteburuko txangoak ere arrakastatsuak izaten dira, bertso saio, hitzaldi, antzerki emanaldi eta ikastaroekin batera