Ipar Euskal Herriko 180 erakundek bat egin dute Bai Euskarari akordioarekin. Euskal Konfederaziokoek adierazi dutenez, «euskararekiko atxikimendu handia» agertu da Ipar Euskal Herrian. Aurretik izenpetu dutenez gain, hauek dira, besteak beste, akordioarekin bat egin dutenak: «Sud-Ouest» egunkaria, Radio France Pays Basque irratia, «Le Petit Basque» aldizkaria eta Conforrama saltegia. Pasa den ostiralean egin zuten izenpetze ekitaldia.

EAEko Irakasleen Alfabetatze-Euskalduntzea polemikan murgildurik dago. Iazko azterketen emaitzak jakin bezain pronto (% 52,2k baino ez du lortu lehen hizkuntz eskakizuna eta % 45ek bigarrena), sistema aldatu beharra dagoela esan dute sindikatu guztiek. UGTk eta CCOOk Hezkuntza Sailean aldaketa proposamen batzuk egin dituzte, baina Jaurlaritzak ez ditu ontzat eman eta Iralek orain arteko jardunari eutsiko diola adierazi du.

Eibarko merkatarien erdiak daki euskara, baina laurdenak baino ez du hitz egiten. Eibarko Udalak Siadeco enpresarekin batera egin duen azterketatik ateratako datuak dira horiek. Hala ere herritar guztien batez bestekoa (% 49,5ek daki euskaraz) baino altuagoa da merkatarien euskara ezagutza, eta sektore hau da euskara gehien erabiltzen duena. 650 saltoki, lokal eta bulegok eskuhartu dute azterketa lan honetan. 1997an euskararen erabilpena bultzatzeko programa abiarazi zenetik, hobera egin du egoerak.

Baztango AEK-k badu honez gero euskaltegia. Suinki du izena eta Elizondon zabaldu berri dute. Elizondo, Oronoz Mugaire eta Iruritan urtero osatzen dira euskalduntze eta alfabetatze taldeak; beraz, behar hori asetzera dator euskaltegi berria.