Balantze baikorra egin dute Gure Irratikoek, taldeen erantzuna ez baita makala izan. Epaimahaiaren arabera, Andde Duhalde buru delarik, irabazlea Geroh ormaiztegitarra dugu, beren rock sendoari esker. Bigarrena estilo sailkaezina duen Txitxab izan da, baxenabartarrek eta lapurtarrek osatua; eta hirugarren Segabathor azpeitiarrak, heavy metal garbia lantzen dutenak. Beste maketa lehiaketek ez bezala, «Gazte leiho»k badu bereizgarririk, musika mota guztientzat irekia baitago.

Iragan irailean abiarazi zuten maketa lehiaketa, Gure Irratiak bultzatu arren, beste hainbat erakunderen laguntzaz gauzatu da, hau da, Agorila diskoetxea, Baionako Gazte Informazio bulegoa, SACEM (Egile eskubideen elkartea) eta Euskal Kultur Erakundea. Agorilak halaber, CD bat karrikaratuko du, zeinean lehen hamar taldeen doinuak bilduko diren. Anartean, talde irabazleen maketak Pantxoa Bergara «Xabaltx»en «Hiruak zuzenean» emankizunean izanen dira.

Alta bada, Gure Irratia, Sanoki eta Oxtikenekoek antolatu aurkezpen kontzertua emanen da Senperen, hilaren 28an, larunbata eta arrastiriko 17:00etan hasita, non lehiaketako lehen 10 taldeek joko duten, hala nola: Aixa, Otsoak, Sei urte, Ozke, Harlax, Kolpek, Mugatik eta arestian aipatu Segabathor, Txitxab eta Geroh. Emanaldi berezia eginen du Gure Irratiak Senperetik bertatik. Bestalde, hemendik gutxira Geroh taldeak bira bati ekinen dio: Hiriburu, Baiona Rock, Donibane-Garazi, Pagoa eta Bilboko Kafe Antzokian