Euskal Herrian ere bai. Dagoeneko operatzaile nagusi guztiak bertan daude, eta gehiago ere etorriko dira. Operatzaileen bost talde handien atzean euskal enpresariak daude.
Telekomunikazioen arloa, gaur egun, munduko negoziorik handien eta errentagarrienetakoa da. Horren froga argia da banku handiak, finantza erakunde handiak eta nazioarteko talde handiak negozio horretan kopuru handiak inbertitzen ari direla ikustea. Adierazi beharra dago kablearen eta zuntz optikoaren gerrak, datozen hamar urteotan, bilioi eta erdi pezeta (80.000 milioi libera) baino gehiagoko inbertsioak eragingo dituela Espainiako Estatuan. Gaur egun, enpresa multzo bat dago operatzaile handien atzean. Eta operatzaile handi horiek Euskal Herrian ere ari dira sartzen. Telefonia finkoa, mugikorra, Internet, telebista eta abarren negozioa da. Egunetik egunera operatzaile berrien izenak ezagutzen ari gara, nahiz eta oso ondo jakin ez zein dagoen izen horien atzean, modu orokor batean horri buruzko irudipen bat izan arren.
Telefónica, Airtel, Euskaltel, Retevisión, Jazztel, Uni2 eta abarren atzean enpresa zehatz batzuk daude; telekomunikazioen pastel handi hori bere eskutan dute eta milaka milioiko etekinak lortzen dituzte. Operatzaile handi horien atzean dauden enpresen artean euskal enpresa batzuk ere badaude: esaterako, BBVA, BBK, Kutxa, Vital, Iberdrola, MCC, Eusko Jaurlaritza, EVE... Ez da erraza inbertsioaren eta sortutako gainbalioen kopuru orokor baten balioztapena egitea. Esan dezagun, adibide gisa, BBK-k eta Kutxak Airtel-en duten partaidetza —honen kapitalaren % 8,7rekin— 350.000 milioi pezetatan balioztatu dutela sektoreko atzerriko enpresa garrantzitsuek, azken aste hauetan.
TELEFONICA, ANTZINAKOENA.
Euskaltelen atzean —24.000 milioi pezetako kapital sozialarekin—, gaur egun, honako euskal enpresak daude: BBK (% 25), Kutxa (% 18,5), Iberdrola (% 10), EVE (% 2,0), MCC Taldea (% 2,0), Eusko Jaurlaritza (% 3,0), EITB (% 5,0) eta Vital Kutxa (% 5,0). Kanpoko enpresa batzuk ere badaude Euskaltelen sarturik: esaterako, Telecom Italia (% 18), Endesa Taldea (% 10,0) eta Retevisión (% 3,0).
Airtel 1995ean hasi zen EAEn telefonia mugikorreko operatzaile gisa, eta 1999ko uztailaz geroztik telekomunikazioetako operatzaile orokorra da, bere bezeroei telefonia mugikorra, finkoa eta Interneteko sarrera eskainiz. Operatzaile honek, EAEn daramatzan lau urteetan, 20.000 milioi pezetatik gora inbertitu du. Bere inbertsioaren zati nagusia EAE guztian hedatutako antena-sarea, konmutazio zentro batzuk, sare telefoniko propioa eta abar jartzeko izan da. 200.000 abonatu inguru ditu, eta horrek telefonia mugikorreko merkatuaren % 40ko kuota esan nahi du.
Airtelen kapitalen atzean ere enpresa multzo garrantzitsua dago. Besteak beste, bi euskal enpresa: BBK (% 4,76) eta Kutxa (% 4,01). Airtelen atzean dauden gainerako enpresak honako hauek dira: BSCH (% 30,45), Vodafone Airtouch (% 21,7), British Telecom (% 17,81), Acciona (% 10,8), Torreal (% 3,3), Unicaja (% 2,1), Alba (% 2,7), Caja Asturias (% 2,1).
Azkenik, Retevisiónen atzean honako euskal enpresak daude: Bilbao Bizkaia Kutxa (% 43,5), Kutxa (% 3,5), Nafarroako Aurrezki Kutxa (% 2,8) eta Euskaltel (% 3). Operatzaile honen atzean dauden gainerako enpresak honako hauek dira: Endesa (% 28,6), Telecom Italia (% 28,6), Unión Fenosa (% 13,5), National Nederlander (% 5,5) eta Ibercaja (% 1,4), besteak beste.
Badira beste operatzaile batzuk ere Hego Euskal Herrian aritzen direnak. Esate baterako, 1998ko abenduan hasitako Uni2 eta 1999ko maiatzean hasi zen Jazztel. Operatzaile horien atzean, orain arte, ez zegoen euskal enpresarik. Duela bi aste, ordea, Iberdrolak Uni2 operatzailean sartuko dela iragarri du, telefonia mugikorreko laugarren lizentzia eskuratzeko eta kapitalaren % 20rekin bertako bigarren akzioduna bihurtzeko, % 35 duen France Telecomen atzetik. Euskal enpresa elektriko horrek 100.000 milioi pezeta ditu horretarako xedaturik, bestelako finantza eragiketa batzuekin batera
BBK eta Kutxa bere Airtel-eko akzioak saltzeko aukera aztertzen ari dira, euskal kutxetako iturriek aldizkari honi egiaztatu diotenez. BBKren akzioak (% 4,76) eta Kutxarenak (% 4,01), 1999. urtea amaitzerakoan, 350.000 milioi pezetatan (14.000 milioi libera) balioztaturik zeuden (190.000 BBK-k eta 160.000 Kutxak). Balioztapen hori British Telecomek Airteli buruz egindakoa da, eta horren arabera operatzaile horrek lau bilioi pezetako balioa du. Balio hori are handiagoa izango litzateke Vodafonek egindako balioztapenaren arabera: 4,4 bilioi pezetakoa. Nolanahi ere, kontuan izan beharra dago balio horiek edozein unetan alda daitezkeela, gora nahiz behera.
Negozio honek sortzen dituen gainbalioak ez dira zehazten errazak. Baina badugu erreferentzi bat etekin horiek oso altuak izango direla aurreikusteko. BBK-k, joan den urrian aitortu zuenez, telekomunikazioen negozioan 20.000 milioi pezeta inguru zituen inbertiturik (Euskaltel, Airtel, Retevision...). Airtelen duen % 4,76ko partaidetza, gaur egun, 190.000 milioi pezetatan balioztaturik baldin badago, pentsa genezake, bere akzioak saltzea erabakitzen badu, horrek eragingo lituzkeen etekinak izugarriak izango liratekeela akziodunentzat, baina oraingoz ez du horrelakorik erabaki.
Euskal kutxek Airtelen duten partaidetza saltzearen zergatia honetan datza: British Telecom eta Vodafone-Airtouchek BSCHren Airteleko partaidetza (% 30,45) bereganatzeko eta Espainiako Estatuko telefonia mugikorraren negozioan bete-betean sartzeko taxututako estrategian. Bi erraldoi horiek harantzago ere jo nahi dute, eta BBK-ren eta Kutxaren akzioak ere eskuratu nahi dituzte. Dirudienez, euskal kutxa horiek ez diete muzin egiten, eta egin nahi dizkieten eskaintzak aztertzeko prest daude
Datorren hilean ezagutuko da emaitza. Hilabete horretatik aurrera Vodafone munduko bigarren telekomunikazio-operatzaile bihur daiteke, Japoniako NTTren atzetik. Enpresa japoniarrak 76.119 milioi dolarreko diru-sarrerak izan zituen 1998an (12 bilioi pezeta baino gehiago, ia bilioi erdi libera). Urte horretan bertan Vodafone eta Mannesmann taldeek, guztira, 74.500 milioi dolarreko diru-sarrerak izan zituzten.
Telefonia mugikorreko Vodafone-Airtouch enpresa britaniar-iparramerikarrak joan den abenduaren 23an egin zuen bere azken eta behin-betiko eskaintza Mannesmann enpresa alemaniarraz jabetzeko, eta otsailaren 7an emango da bukatutzat. Akzioak erosteko eskaintza publikoa 138.000 milioi dolarreko kopurura iritsiko da, eta akzio-trukaketa bidez egingo da, Mannesmann-en akzio bakoitzeko Vodafoneren 53,7 akzio emanez. Enpresa alemaneko akziodunek otsailaren 7ra arte dute epea eskaintza onartzen duten erabakitzeko. Eragiketa honen xedea telefonia mugikorreko munduko enpresa nagusia eratzea da, munduko 25 herrialdetan arituz (besteak beste, Euskal Herrian), 42 milioi bezero baino gehiagorekin eta etengabe haziz.
Mannesmann, ordea, Vodafonek egindako eskaintza horren aurka agertu da, erasokortzat jotzen duelako. Bere jarrera joan den astean eman zuen jakitera publikoki, eta eskaintza ez onartzeko deia egin die bere akziodunei. Baina arazo bat du Mannesmannek: bere akziodun gehienak Alemaniatik kanpo bizi dira. Eta, gainera, Vodafonek ziurtaturik du Estatu Batuetan bizi diren akziodunen onarpena, eta horiek bakarrik operatzaile alemaniarraren kapitalaren % 30 osatzen dute
© 2008-2011 Argia.com - Komunikazio Biziagoa
Erreportajea 
