Argia astekaria webgunearen hasiera

Bisoiaren bizitokia lineala da; uraren masa eta ibilbideetara, eta hauen inguruko guneetara atxikitzen da. Badirudi, edozein aldaketak bere presentzia kolokan jarri dezakeela. Horrela, drenajea eta ibilguen kanalizazioa, maila freatikoaren alterazioa eta urbazterreko begetazioa desagertzea bisoia desagertzearen arrazoitzat hartu dira.
Bisoi europarraren kopuruak behera egitearen beste arrazoitzat uraren kontaminazioa jotzen da. Uraren ibilguen kontaminazioa bisoi europarrarengan nola eragiten duen ez da aztertu, baina bai amerikarrarengan. Animalia hau metilmerkurioarekiko, PCBkiko eta intsektizida organokloratuekiko (DDT, DDE, dieldrine) oso sentikorra da eta ehun kontzentrazio txikia nahikoa da bere ugal prozesuarengan nabarmen eragiteko. Gure ibaien kontserbazio egoera desberdina da. Nafarroako iparraldekoak eta Kantaurira isurtzen duten ibaien buruak egoera onean daude. Bestalde, Zadorra, Ebro eta kantauriar ibaien zati ertain eta behekoak oso aldatuta daude. Dena dela, bisoiak itxuraz bederen tolerantzia erakusten du, egoera oneko zein txarreko ibaietan bizi baita