Argia astekaria webgunearen hasiera

ETAren urriko komunikatuak egoera larria adierazten zuen. Belen Gonzalez atxiloketak larritasun hori baieztatzen zuen.
ETAk lau puntu jartzen ditu solaserako: ea Gobernu espainiarra Euskal Herriaren erabaki eta borondatea onartzeko prest dagoen jakitea, borondate hori bideratuko duen prozesua nola bermatuko duen jakitea, euskal preso politikoak noiz eta nola askatuko dituen jakitea, eta indar armatuak noiz eta nola aterako dituen jakitea. Mintzakide gisa hiru preso izendatzen zituen komunikatuak: Algeciseko espetxean dagoen Antton Lopez Ruiz, Langraitzen dagoen Josu urrutikoetxea eta Josetxo Arizkuren, Parisen dagoena. Bilera lekua, halaber, ezin da izan ez Frantzia eta ez Espainia; Euskal Herria bai, baina baldintza neutralak emanez gero.
Munduko edozein bake prozesuri arreta jarri dionak, ondo asko daki horrelako komunikatu bat ez dela egiten talde armatua eta gobernuaren arteko bilera bat egiteko. Arrazoi asko egon daitezke horrelako komunikatu bat plazaratzeko, baina ez bilera egitea. ETAk abuztuaren bukaeran Gobernuarekiko komunikazioa moztean ondo adierazi zuen bezala, zuhurtasuna ezinbestekoa da elkarrizketei bide egokia emateko. Gatazkaren inguruan ari diren aktore askok adierazi dute begibistako den hori.
Proposatutako mintzagaiei dagokienez ere, ez dago inongo baldintzarik, dena da jakinmina, baina negoziaziorako tresna baino, ohiko aldarrikapenen zerrenda bat da. Urte eta erdiko su-etena ikusita, ez dago ETAren hitz egiteko borondatea auzitan jartzerik, behintzat jakin dakiguna eta ikusi dugunaren arabera. Baina komunikatu hau ikusita, begibistakoa da ez dela bilera bat egiteko.
Aljerreko 89ko elkarrizketa prozesuan, ETAk PSOEko Gobernuaren mintzakidetzarekin hitzartutakoa ez zela betetzen ari salatzen zuen zenbait komunikatuetako doinua du urriko komunikatuak. Eta dinamika honek jarraituko balu, oso posible litzateke ETAk su-etena apurtzea, bestela erakunde armatu batek izan behar duen sinesgarritasuna auzitan jarriko litzateke eta.
Behin eta berriro esan da, edo aditzera eman da, ETAren su-eten honek behin-betiko izan nahi duela eta borroka armatua guztiz alboratzeko nahia dagoela, gutxieneko baldintza politiko batzuk emanez gero bederen. Hori da ETAren buruan egon daitekeena, IRAren buruan egon daitekeen moduan. IRAk, taktikoki ez bada ere, su-etena oso modu neurtuan apurtu zuen. Posible litzateke horrelakorik Euskal Herrian? Posible bai, baina horrek ez luke esan gura Irlandan moduan gero bake prozesua berreskuratuko litzatekeenik, gutxienez horren epe laburrean. Aitzitik, seguruenik denbora luzea beharko litzateke. Abertzaleen elkarlana eta Lizarra-Garaziko Ituna Irlandako Forotik abiatu zela, horiexek dira bi prozesuen antzekotasun handienak, gainerakoan oso desberdinak dira. Borondatea behar da baina denbora luzea ere bai, hori da gainerako prozesuetatik atera daitekeen ondorio nagusienetakoa