Armen esportazioa gora, telebistari esker
Amerikako industria militarra pozarren dabil, azken urteetako gastu militarren murrizketaren ondoren, bai baitirudi Etxe Zuria eta Kongresua ados daudela defentsa nazionalari aurrekontuaren batez besteko handiago bat ematearekin. Gauzak ondo bidean, Defentsa Departamentuaren kontratu berri gehiago espero dute. «
Gure sektorearen aurreikuspenak nabarmen handitu dira, gaur egun Washingtonen gure indar armatuak sendotzeari buruz dagoen eztabaidaren ondorioz», adierazi du Industria Aeroespazialen Elkarteko Alexis Allenek. Bere ustez, Jugoslaviaren aurkako gerrak «
luzaroan jarraitzen badu, izakinak eskuratu beharko dira berriro —hau da, misil gehiago, hegazkin gehiago, lehergailu gehiago...— eta hori onuragarria litzateke guretzat».
Sektoreko bozeramaile berak dionez, gainera, Jusgoslaviaren aurkako gerran erabiltzen den armamentuaz telebistaren bidez mundu guztira iristen den dohaineko publizitate iraunkorrari esker, kanporako salmenten gorakada etor daiteke. 15 bilioi pezetako kostua izan zuen 1991ko Golko gerraren ondoren, EEBBetako defentsa industriak atzerriko herrialdeen eskari zaparrada ikaragarria izan zuen. Nolanahi ere, Jugoslaviaren aurkako erasoaren ondoren ez dute uste hainbesterainokoa izango denik. EEBBetako defentsa industrian hirugarren den Lockheed Martin enpresako bozeramailea ere bat dator uste horrekin: «
Zeharkako eragin bat egon daiteke, baina ez dut uste inork pentsa dezakeenik Golko gerraren ondorengo egoera berriro eman daitekeenik». Atzerriko herrialdeak dira industria honen merkaturik errentagarriena egun. Iaz sektoreak bere historiako superavit komertzialik handiena izan zuen, 41.000 milioi dolarrekoa
Erantzunak
Erantzunik ez dago.
Izartxoaz (*) markaturiko datuak derrigorrez bete beharrekoak dira.
Lege Oharra
RSS sindikazioa