Argia astekaria webgunearen hasiera

Zerbitzu mota honetan Etxebide Europa mailan aitzindaria izan baldin bada, ordurarte hiritarrek erakunde ezberdinetan egin beharreko paperlan asko arintzea lortu duelako izan da, beti ere baliabide tekniko zein kudeaketa eraginkorrei esker. Adibide esanguratsu moduan: Etxebidek zuzenean eskatzen dio dagokion Foru Ogasun, Udal eta Jabetza-erregistroari hiritarrari lortzeko zail egiten zaion informazioa. Administrazio-bideratze txiki baina neketsu gehienak saihesten ditu hiritarrak horrela. Urtebete eskasean jaso diren 100.000 telefono deiak zerbitzu honek sortarazi duen interesaren erakusgarri dira.
Zer da baina Etxebide? Eusko Jaurlaritzako Etxebizitza eta Ingurugiro Sailak EAEko hiritarron zerbitzura jarritako etxebizitzari buruzko komunikazio bide berria da Etxebide. Bertako telefono zenbakia 902 42 44 44 da eta zenbaki horren bidez, interesatu guztiek etxebizitzaren gaiaren gaineko aholku eta laguntza lor dezakete.

Alde batetik, Etxebizitza Sailak sustatzen dituen pisu guztietarako zuzeneko atzipena, hau da, bai salgai baita alokatzeko daudenak ere. Bestetik, Etxebizitza Sailak eskaintzen dituen dirulaguntzen tramitazioa egiten da, etxebizitzen erosketa, alokatzea eta konponketa erraztu ahal izateko.
Etxebidek oso lankidetza sare handia du, kasu bakoitzak beharrezkoa duen aholkularitza eta norbanako laguntza ahalbidetzeko. Interesatuak etxean jaso ahal izango ditu informazio eta formulario guztiak. Pertsona bakoitzak aholkuak eta laguntza emango dizkion pertsona hautatzen du, dagokion Lurralde Ordezkaritzan edo banketxe laguntzaileren batean hitzordua eskatuz. Dokumentazioa non aurkeztu ere norberak erabakitzen du (ordezkaritzaren batean edo Etxebizitza Sailak dauzkan edozein 200 arreta puntutan).
Pertsona batek, etxebizitza eskatzaile gisa, alta hartzen duen momentutik, halaxe izaten jarraituko du harik eta etxebizitza bat lortu edota baja borondatez hartu arte. Bere eskaria indarrean dagoen bitartean, etxebizitza esleipen guztietan hartuko du parte automatikoki, esleipen horietako baldintzak betez gero, jakina.
Sailak bere promozioei buruzko eta intereseko edozein berritasuni buruzko informazio zehatza bidaliko dizu etxera. Era berean, etengabeko aholkularitza hartzen arituko da interesatua prozesuaren urrats bakoitzean.
Norbaitek laguntza-eskaria bideratuz gero, informazio eta aholku zehatz guztiez gain, egindako eskariaren egoeraren berri jakin ahal izango du Etxebideren bitartez