Euskadi Irratiak eta ETBk «Kantuz Goraintzi» izeneko kantu lehiaketa antolatu dute. Hemezortzi urtez gorako edonork parte har dezake eta zerrenda batetik aukeratutako hiru kantu grabatu beharko ditu. Finala maiatzaren 5ean egingo da Zornotzako antzokian.
ARGIA. Noren ideia izan da lehiaketa antolatzea?
JULIAN BELOKI Aspaldidanik ETBk eta Euskadi Irratiak genuen ideia da. Abiapuntuko ideia eskutan hartuta, batez ere Euskadi Irratitik landu da lehiaketa nola bideratu. Irratian egingo da, baina bukaera ETBk zuzenean eskainiko du. Irratiak eman diezaiokeena baino zabalkunde handiagoa ematen dio telebistaren indarrak. Gero eta gauza gehiagotan beharko genuke elkarren lankidetza.
A. Zein da lehiaketaren helburua?
J.B. Jolasbidea izatea nahi genuke. Ahalik eta jende gehien jolasean sarraraztea eta euskal kantagintzaren esparruan gehiegi landu gabeko atal batean jendea agertzea nahi dugu. Kantuzaletasuna zenbaterainokoa den ikusi nahi dugu.
Lehiaketak mugak dauzka; play back-ak aurrez prestatu behar ditugu eta ez da norberaren tonu egokian abesteko aukerarik izango.
A. Jende asko aurkeztuko dela uste duzue?
J.B.Oraintxe lehenengo egunetan gaude eta ez dago mugimentu handirik. Lehiaketa maiatzaren 5ean bukatzen da eta ordura arte aurkez daiteke jendea. Lehiaketari eman diogun dinamikagatik ez dago jende gehiegi onartzerik ere, asko jota 22 interpreterentzat aukera legoke.
A. Nola egin duzue kanten hautaketa?
J.B. «Goraintzi» saioko produkzio lanetan jarduten den Fran Lasuenekin hitz egin eta kantu zerrenda proposatu zigun. Hiru ataletan banatuta dauden bederatzi kantu hautatu genituen.
© 2008-2011 Argia.com - Komunikazio Biziagoa
Elkarrizketak 
