Urruñako gazteek herriko plaza okupatuko dute gaztetxe eske abuztuaren 21etik 23ra
Gaztetxea aldarrikatzeko herriko plaza okupatuko du Urruñako Gazte Asanbladak abuztuaren 21etik 23ra bitartean. Duela sei urte antolatzen hasi zirenetik eskatu dute biltzeko tokia. Okupazioaren hiru egunetan gaztetxea izango balute antolatuko lituzketen ekimenak egingo dituzte Herriko Etxearen aurrean.
Asanbladako kide Txomin Povedak Antxeta irratian adierazi du herriko auzapez Odile de Coralekin bildu direla, baina gaztetxea ukatu diela beste behin. "Gazte guztiak kontrolatu nahi ditu Herriko Etxeak, aktibitate kontrolatuak soilik proposatuz", esan du.
Gaztetxearen aldarriaz urruñarrak informatzeko duten modu bakarra plaza okupatzea dela adierazi du Povedak. Modu berean, okupazioarekin Herriko Etxeari “seinale azkar bat” bidali nahi diotela esan du.
Hitzaldiak, azoka, jolasak, herri kirolak eta dantza izango dira bestak beste hiru egunetan. Hala ere, egitarauaren xehetasunak aurrerago aurkeztuko dituzte.
Gaztetxea gazteak bildu eta alternatibak lantzeko
Urruñako Gazte Asanbladak gazteen ideiak eta indarrak batuz proiektu berriak garatzeko espaziotzat ikusten du gaztetxea. Gizarte-gaien inguruan hausnartzeko lekua ere badela azaldu du, “alternatiba ildoez” jabetu eta hauek lantzeko.
Eraikinetik ateratzeko agindua eman diete Zestoako Gazte Asanbladako kideei, eta prozesuaren gastuak ordaintzera zigortu dituzte. Gaztetxearen defentsan mobilizatzera deitu dute igandean, otsailak 4, Zestoako plazatik.
Zestoako Elizondo eraikina gaztetxe berri gisa okupatu zuen Gazte Asanbladak. Eraikina Elizaren jabetzakoa da, eta gotzaindegiak gaztetxearen aurkako prozedura abian du. Protesta ekintzak nagusitu dira azken asteetan, igandean Zestoako elizan, esaterako. Zestoako Udalak adierazi... [+]
Zestoako Gaztetxearen kontrako prozedura judiziala mantentzen du Elizak: asteazken honetan izango da epaiketa. Aurreko ostiralean, Gaztetxearen aldeko elkarretaratze bat izan zen Donostiako Artzain Ona katedralean.