Auzipetuen abokatuek behin baino gehiagotan salatu dute haien kontrako frogarik ez dagoela eta polizien interpretazioak direla froga modura erabili nahi direnak. Bestalde, salatu dute defentsarako aukera erabat murriztu diela Auzitegi Nazionalak, aurkeztutako lekuko, peritu eta froga ia guztiak ukatu ondoren. Hain zuzen, egoera horren aurrean, Demokrazia eta Giza Eskubideen Europako Abokatuen Elkarteak (ELDH) ordezkariak bidaliko ditu Madrilera behatzaile gisa.

Udalbiltzako auzipetuek elkartasun eta babes ugari jaso dute jadanik oso esparru ezberdinetatik. Joan den astelehenean, esaterako, alderdi ugaritako ordezkari politikoek (EAJ, ezker abertzalea, PSE, PSN, EA, Aralar, EB), eta sindikatuetako, gizarte erakundeetako eta kulturako izen ezagunek manifestua sinatu zuten Udalbiltzako auzipetuen absoluzioa eskatuz. Larunbat honetan, bestalde, manifestazioa egingo dute Bilbon Udalbiltza aske! lelopean.

ARGIAk aste honetako alean erreportaje zabala dakar Udalbiltza auziaren inguruan (irakurri PDF formatuan). Bestalde, ARGIA.com-ek jarraipen berezia egingo dio epaiketari iraun bitartean, prentsan atera diren artikuluen bilduma eginez eta epaiketaren gorabeherak aztertuz.