Mohammad Rujailah eta Alberto Arceren To Shoot an Elephant dokumentala Euskal Herriko hainbat gaztetxe, kultur etxe eta elkartetan proiektatuko da astelehenean. Israelek Gazaren aurka abiatutako berun urtua operazioa amaitu zenetik urte bete igaroko da egun horretan. 1.450 hildako eta 5.570 zauritu utzi zituen sarraskiak, eta egun hau baliatu nahi izan dute sarraskiaren testigu izan zirenek Israelen politikarekin amaitzea ezinbestekoa dela aldarrikatzeko. Nazioarteko proiekzio global honen baitan, besteak beste, Bilboko La Bolsan, Santurtziko La Kelo gaztetxean, Urretxuko Gaztetxean, Errenteriako Mikelazulo Elkartean, Zarauzko Arrano tabernan, Etxauriko Udaletxean, Zizur Nagusiko gaztetxean eta Gasteizko Hikateneoan egingo dira emanaldiak. Guztiak mapa honetan ikus daitezke. Lizentzia librea duen dokumentala Eguzki Bideoak-ek banatzen du, eta Internetez ere deskarga daiteke.

- Irakurri Iñigo Astizek ARGIAren 2.214. zenbakian filmari buruz idatzitako erreportajea