SAREKO ARGIAk Donostiako Victoria Eugenia antzokiko Klub aretoan egingo du 10. urteurrena ospatzeko ekitaldi nagusia, arratsaldeko 19:00etatik aurrera. Ongietorri hitzalditxoaren ostean, Patxi Baztarrika Eusko Jaurlaritzako Hizkuntza Politikarako sailburuordeak hitz egingo du, eta haren ondoren Xabier Letona ARGIAko zuzendariak. Hark aurkeztuko ditu SAREKO ARGIAren proiektu berriak: Bideoak kanal eraberritua, Euskal Herrian zehar egindako 400 ibilbidetik gora jaso duen Ihesi kanala, eta Euskal Kulturaren Urtekariaren Interneteko bertsioa. Proiektu horien berri Ideia berrien multid@ntza erreportajean eman genuen.

Halaber, Zeruko Argia eta Argiaren artxibo historikoa ere Interneten jarriko dugu aurki. 1919tik gaur arterako aleak eskainiko ditugu bertan; orotara 60.000 erreferentzia inguru.

Letonak amaitutakoan, SAREKO ARGIAko lagunek Sareko Argia, 10 urte bideoa eskainiko dute. Hamabost minututan, web gunearen historia, oraina eta etorkizuna laburbilduko du ikus-entzunezkoak. Victoria Eugeniako ekitaldia hasi aurretik, bideo hori www.argia.com webgunearen azalean jarriko dugu ikusgai.

Ekitaldiari Vicent Partal Vilaweb.cat egunkari elektronikoko zuzendariaren Vilaweb, esperientzia eredugarria Katalunian izeneko hitzaldiak emango dio amaiera. Argia astekariaren hurrengo zenbakian Partali egindako elkarrizketa irakurri ahal izango duzue.

SAREKO ARGIAren 10. urteurrena dela-eta, Internetek azken urteetan izan duen garapenari buruzko mahai-ingurua egin genuen pasa den astean Luistxo Fernandez, Gorka Julio, Aitor Lopez de Aberasturi eta Lontzo Sainzekin. Mahai-ingurua PDF formatuan irakurri dezakezue; han hartutako irudiekin bideo bat ere osatu dugu.

Euskadi Irratiak ere grabatu zuen mahai-ingurua, eta gaur eskainiko du laburpen bat, iluntzeko 21:08etatik aurrera, Esaidazu saioaren barruan.