Soziedad Alkoholika musika taldeko kideak errugabetzat jo ditu Espainiako Auzitegi Nazionalak. Epaileek ez dute terrorismoaren goraipamenik eta biktimen aurkako mespretxurik hauteman abestietan. Fiskalak musika talde gasteiztarreko kideen aurka urte eta erdiko kartzela zigorra eskatu zuen, euren abesti batzuetan ustez terrorismoa goraipatzeagatik. Soziedad Alkoholikaren aurkako prozesua Terrorismoaren Biktimen Elkarteak (AVT) kereila jarri ostean abiatu zen. Elkarte horrek bi urteko espetxe zigorra eskatu zuen taldeko kideentzat. Fiskalak iragarri du ez duela auziaren aurka helegiterik jarriko.