Sakanako (Nafarroa) Guaixe aldizkaria eta Beleixe irratia laguntzea du xede Bierrik fundazioak abian jarri duen Sakandar 1, euro 1. 20.000 baietz! egitasmoak. Duela hilabete batzuk, Xabier Azanza Euskarabideko zuzendariak iragarri zuen Nafarroako euskarazko hedabideek 240.000 euro jasoko zituztela. Diru partida hori aintzat hartuta, Bierrik elkarteak Guaixe aldizkariari maketa aldatu zion eta Beleixe irratia egoitza berri batera eraman zuen. Baina hedabideek ez dute dirurik jaso, eta Bierrik fundazioak 20.000 euroko zorrari egin behar dio aurre orain. Horretarako jarri du abian aipatu kanpaina. Sakanako herrietako taberna eta dendetan itsulapikoak jarriko dituzte, herritarrek euren ekarpenak egin ditzaten.