Protesta eta tentsioa, biak goraka

  • Greba ez da orokorra izan Nafarroan, martxokoan bezala. Orduan sindikatu guztiek deitutakoa zen eta, oraingoan, euskal gehiengo sindikalak eta sindikatu txikiago batzuek deitu dute. Hedabideek eta sindikatuek aipatu dute, oro har, beste batzuetan ere eman den fenomenoa: Nafarroako Iparraldean greba ia orokorra izan da, Iruñerrian garrantzitsua eta txikiagoa erditik hegoaldera.


2012ko irailaren 26an - 00:00
Azken eguneraketa: 2015-02-26 13:37:33
Iruñeko manifestazio burua Sarasate pasealekura iritsi den unean.

Baina hori ezaguna izaten da, eta sindikatuek, hala ere, greba orokorra deitzen dute, Mitxel Lakuntza ELAko buruzagiak manifestazioaren bukaeran aipatu duen eran, “gainera datorkigunarekin gu ezin gaitezkeelako zain egon, beste batzuk bezala”, UGT eta CCOOri erreferentzia eginez eta entzuleen txistu soinu ozena piztuz.

Goizeko manifestazioa izan da ekitaldirik garrantzitsuena eta sindikatuen arabera, 15.000 bat jende bildu da. Ez dakit hori ote zen, baina milaka pertsona asko bai. Hala ere, martxoko greba orokorrean baino gutxiago esango nuke. Neurgailua: oraingoan zein aurrekoan, manifestazio burua  Sarasateko Foruen monumentura iritsi eta orduan oraindik milaka batzuk zeuden atera gabe Gazteluko Plazatik eta gaur 500-1000 bat lagun geratuko ziren atera gabe.

Goizean goizetik, beste batzuetan baino tentsio handiagoa egon da kaleetan. Alde Zaharrean eta Bigarren Zabalgunean behintzat poliziak nonahi ziren barreiatuak furgonetekin eta piketeekin. Goizean zehar, karga bat baino gehiago izan da eta horietako batean polizia nazionalak Sabino Cuadra Amaiurko diputatua ere jo dute borraz. Piketeak ere ohi bezala ibili dira, zabalik ziren dendei eransgailuak jarriz nagusiki, baina talderen batek erakusleiho bateko kristalak behintzat hautsi dituzte Pozo Blanco kalean. Piketeen eragina nabaria zen –denda asko atea itxita, baina argia piztuta barruan…–, baina erabat itxitakoak ere asko ziren Iruñeko erdialdean, batez ere Alde Zaharrean.

Eta, azkenean, Sarasate Pasealekuan lehertu da tentsioa Mikel Alzuart (EHNE) eta Mitxel Lakuntzak (ELA) hitz egin ondoren, LABeko Igor Arroyoren txandan. Parlamentuaren aurrean izan dira lehen lasterketak eta 10 bat minutuan Foruen monumentura ere iritsi dira, batez ere alboko kaleetatik poliziak zetozen poliziak eta manifestarien artean sortutako enfrentamenduengatik. Zauritu batzuk ere izan dira, horietako bat gazte batek belarri inguruan jasotako gomazko pilotakadaz.

Ez, ez da orokorra izan, baina azken bost greba orokorrak kalean jarraitu dituenak argi ikusiko du mobilizazioak goraka doazela eta egoera gogortzen ari dela, bizitzaren egunerokoan gero eta gehiagorentzat gogortzen ari den moduan. Gero eta gehiagok pentsatzen du Nafarroan aldaketa garaiak bizi daitezkeela datozen urteetan, LABeko Igor Arroyok ere nabarmen azpimarratu du hori gaurko manifestazioko hitzaldian (ARGIAko gaurko Storifyan ikus dezakezue bideoa). Eta bai, batek daki gauzatuko den ala ez, baina aldaketa usaina bada.


Azkenak
2024-03-31 | Julen Azpitarte
Zinearen historiako film-kontzerturik “onena”

Oscar sari andana jaso zuen The Silence of the Lambs (1991) thriller-a zuzendu zuen Jonathan Demme (1944-2017) zinegile estatubatuarrak estreinatu zuen zineak inoiz eman duen kontzerturik onena: 1970eko hamarkadaren erdialdean New Yorken eratutako Talking Heads taldearen Stop... [+]


"Enpresa pribatuen esku utzi da segurtasun publikoaren norabidea"

Ertzaintzaren azken hamarkadako bilakaera teknologikoa aztertu du bere liburu berrian Ahoztar Zelaieta ikerketa kazetari, kriminologo eta ARGIAko kolaboratzaileak. Segurtasunaren industria ikertu eta Ertzaintzarekin duen lotura plazaratu du, La Ertzaintza que viene... [+]


Campi Bisenzioko GKN fabrikan batu dituzte langile borroka eta ekologismoa

2021eko uztailaren 9an jaso zuten kanporatze abisua Campi Bisenzioko GKN lantegiko 422 langileek. Biharamunean berean abiatu zuten fabrikaren okupazioa eta orduz geroztik bertatik dabiltza borrokan, deslokalizazioaren aurkako borroka zena bestelako industria eredu baten aldeko... [+]


Judith Bilelo Biachó
"Erakundeek ez digute lagunduko, guk geure hizkuntzan hitz egitea lortzen ez badugu"

Judith Bilelo Biachó gure artean izan zen iragan udazkenean, Garabideren Aditu programaren karietara. Ekuatore Ginean jaioa (Malabo, Bioko, 1975), bubi etniako kide da, bubiera hiztun eta hizkuntzaren aldeko militantea. Iraganaz bezainbat mintzo da orainaz, geroari... [+]


Eguneraketa berriak daude