Patxi Uribarren (Aramaio, 1942) karmeldarra da euskaltzain oso berria. Henrike Knörr zenaren aulkia beteko du Uribarrenek. Jose Luis Lizundia, Andoni Sagarna, Sagrario Aleman eta Jean-Louis Davant euskaltzainek proposatua izan zen. Filosofia eta Letretan –tesi txikia egin zuen Aramaioko toponimiari buruz– eta Teologian lizentziatua da Uribarren. Hiztegigintzan lan handia egin du – Euskarazko hiztegia, Sinonimoen hiztegia eta 3000 hiztegia moduko argitalpenetan parte hartu du– eta Karmel aldizkarian iritzi, ikerketa eta dibulgazio lanak argitaratu ditu.
