Juan Carlos Espainiako Erregea telebista bidez adierazpenak egiten estatu kolpe saiakeraren ostean.

Der Spiegel Alemainako astekariak argitaratu du 1981ean Espainiako enbaxadore alemaniarra zen Lothar Lahn-ek bere herrialdera bidali zuen txosten bat. Honen arabera, Juan Carlos Espainiako erregeak, 1981eko otsailaren 22an estatu kolpea ematen saiatu zirenekiko "ulerkotasuna eta sinpatia" erakutsi zion.

Orain gutxi desklasifikatu diren Alemaniako Errepublika Federaleko Historia Politikoko Dokumentuetan oinarritu da astekaria baieztapen hori egiteko. Bertan deskribatu egiten da Lahn enbaxadoreak eta Juan Carlos erregeak 1981eko martxoaren 26an izandako elkarrizketa bat, eta bertan, erregeak, gertaerak gaitzetsi beharrean, kolpistak ulertzen zituela esan zion.

Alemaniako enbaxadoreak informean dio, Juan Carlosek ondorengoa esan ziola: "Militar hauek guztiok nahi duguna besterik ez dute nahi", eta zehaztu zuela, "disziplinaren berrezartzea, ordena, segurtasuna eta lasaitasuna". Adolfo Suarez orduko presidenteari egozten zion erregeak estatu kolpearen ardura guztia.

Erregeak, horrez gain, aitortu zion kolpistei zigor gogorrik jar ez ziezaieten gobernuan eta tribunaletan eragiten saiatuko zela, beti ere enbaxadore alemaniarraren hitzetan. Otsailaren 23 hura ahal bezain azkarren ahaztu behar zela ere esan bide zuen.

Efe agentziari egindako adierazpenetan, Espainiako Errege Etxeak adierazi du 1981eko otsailaren 23 hartan erregeak izan zuen papera eta jarduna historiak "kontsolidatu" dituela. Demokrazia tinko babestu zuela gauza jakina da Espainiako gizartean eta mundu osoan".