Deiaren azala / Deia

"Batasunak 2005ean ikastolen mugimendua kontrolatu eta zuzentzeko proiektua diseinatu zuen", izenburu hori ipini diote gaur Noticias taldeko egunkariek beren orrietako albiste nagusienetako bati. Batasunaren barne-dokumentu bat aipatuz, egunkarion arabera, gaur legez kanpo utzita dagoen ezker abertzaleak uste izan zuen ikastolak eraikuntza nazionaletik urruntzen ari zirela eta hauen lana Euskal Eskola Nazionalera bideratu beharra zegoela. Egunkariok diotenez, Batasunak zenbait kritika egiten zien ikastolen orduko Konfederazioari, besteren artean hauek: Kontseiluaren lana sekula ez babestu izana, Euskal Unibertsitatearen proiektuarekiko jarrera, Euskaldunon Egunkariaren itxiera eta horrekin lotutako atxiloketak (tartean Xabier Oleaga Oreretako ikastolako lehendakariarena) salatu ez izana. Batasunak bere gain hartu omen zuen ikastolen sarea bideratzeko erantzukizuna, berrikitan kooperatiba berrian mamitu den hiru urteko eztabaida hasi baino pixka bat lehenago.