ARGIAko kazetari Unai Break euskaraz diharduten nafar hedabideek aurten jasoko duten diru-laguntzari buruz idatzi zuen atzo ARGIA.com-en, Nafarroa: azkenean diru-laguntza bai, baina mesfidantza ere bai artikuluan. Break Nafarroako hedabideen artean sortu den "mesfidantza" aipatu zuen. Eta mesfidantza hori izu bihurtu dela. Bada, Euskarabideak Topaguneari jakinarazi dio Nafarroako Gobernuak datorren urterako 9.567 euroko diru poltsa gordeko duela euskarazko hedabideentzat, aurtengoa baino %96 gutxiago. Gogoratu, aurtengo kopurua hasieran aurreikusita zeuden 310.000 eurotik 240.000 jaitsi dela azkenean. Kopuru hori negoziaezina dela esan du Euskarabideak eta 2009ko aurrekontuetako zirriborroan aurreikusi bezala geratuko dela. Azaroaren 5ean euskarazko hedabideak Perez Nievas Hezkuntza kontseilariarekin bildu ziren eta hark kopuru hori negoziatzeke zegoela esan zien.

Nafarroako euskarazko hedabide guztiek abenduaren 18rako nafar Legebiltzarreko Hezkuntza batzordean agerraldia eskatua zeukaten. Segurtasun gehiago eskatu eta datorren urterako hitzarmen proposamen bat egin nahi zuten. Agerraldi hori prestatzeko hedabide guztiek atzo bildu behar zuten. Elurra tarteko, ezinezkoa izan zitzaien biltzea. Eta albiste honek kanpoko giroak baino gehiago izoztu ditu.

Joxe Rojas Topaguneko prentsa arduradunarekin hitz egin dugu eta hedabideen arteko bilera ostiralera atzeratu dutela jakinarazi digu. Orain, ezbairik gabe, agerraldira begira pentsatu beharreko estrategia aldatuko da: "Gure helburua lankidetza eskaintzea zen, orain saiatu beharko dugu, baina oso zaila izango da hori egitea, jendea oso haserre baitago", adierazi digu Rojasek.