Manifestazio ilegala atzo Donostian. Espero zen bezala, istiluak izan ziren Ertzaintza eta bertan bildutakoen artean. Berririk ezer gutxi. Hala ere, trataera bitxia Espainiako 20 minutos egunkarian eman diotena. Testuan gauza berririk ere. Errepara diezaiogun argazkiari.
20 minutos kazetan atzoko Donostiako istiluak ilustratzeko Reuters-en argazki bat erabili dute (ezkerraldean duzue). Vincent Westen lana. Hainbat gazte ikus daitezke harri eta botilak jaurtitzen. Argazkia ikusgarria da, indar handikoa. Hartu denbora argazkia lasai begiratzeko, merezi du eta. Palestina ekarri dit gogora niri.
Begira dezagun orain Vincent Westek bere argazkia nola bidali zuen agentziara, eta era berean, Reutersek hedabideen eskura jarri duena. Ez dizkizuet bi argazkien arteko zazpi ezberdintasunak eskatuko, baina ea baten bat topatzen duzuen. Zerbait falta bada, garrantzia handikoa ote den, errealitatearen ikuspegi hori erakustea garrantzitsua den ala ez. Reuters-en webgunean ikus daiteke irudi originala.
Objektibotasun osoa ezinezkoa omen da kazetaritzan. Fotokazetaritza kazetaritzaren adar bisualetako bat izaki, berdin hemen ere. Zerbait ateratzean, beste zerbait kanpoan utzi behar. Hala ere, intentzioan dago kazetari zuzen eta maltzur (hitz bat aukeratu behar izanez gero) baten arteko aldea. Dena ezin da kontatu, baina errealitatea nahita itxuraldatzen dutenak dira gure ogibidearen izen txarraren eragileak.
Bakoitzak atera bitza bere ondorioak.
