“Ipar Euskal Herrian krisiaren ondorioak senti daitezke oraindik”, adierazi du Baionako Merkataritza eta Industria Ganberako lehendakaria Andre Garretak. Hala ere, nabarmendu du Ipar Euskal Herria krisiari “gogor” erantzuten ari dela. Datuek, baina, ez dute hobekuntzaren zantzurik ematen. Ipar Euskal Herrian, langabezia tasa %9,7koa da, beraz, 2013 urtearen amaieran.

Gutxieneko errenta, askoren errekurtso bakarra

Gutxieneko errenta jasotzen dute 7.979 pertsonek, ekaineko datuen arabera. Horietatik, %58,4 errentatik horretatik baino ez da bizi; alegia, 4.660 pertsona. Gutxieneko errenta 455 eurokoa da –Diru kopurua igo daiteke, seme-alaba kopuruaren arabera–.

Lanpostu gehien industriak galdu ditu; osotara 350 langile kaleratu dituzte urtebetean. Gainontzeko sektoreetan ere antzeman dute krisia: Eraikuntzako lanpostu kopurua apaldu da; eta zerbitzuetan, ehun bat pertsona kaleratu dituzte, azken hiruhilekoan.

Ekoizpen informatikoa, elektronikoa eta optikoa ere jaitsi dira.

Enpresak sortu bai, baina baita itxi ere

Enpresen sorrerari dagokionez, Urtarriletik abuztura 1.419 enpresa sortu dituzte. Baina, aurretik lanean ari ziren askok porrot egin dute; aurten, 719 enpresa itxi dituzte, batez ere merkataritza eta ofizialen sektoreekin lotutukoak.

Desagertzen den enpresa bakoitzarekiko, 1,79 enpresa berri sortzen dute, Ipar Euskal Herriko egoera ekonomikoari buruzko txostenak erakusten duenez.

Baionako Merkataritza eta Industria Ganbera baikor

Baionako Merkataritza eta Industria Ganberako lehendakariak enpresen desagerpenari buruz baino, enpresen sorkuntzaren inguruan mintzo da. Haren aburuz, enpresak sortzeko gogoa “beti hor da”, eta hori oso positibotzat jo du.

Hazkuntza bilatzeko, “eraldaketa sakona” proposatu du Garretak. Horretarako hiru gako aipatu ditu: Gaitasuna, kalitatea eta berrikuntza.

Agindu duenez, Merkataritza eta Industria Ganbera ildo horiek landuko ditu; ganberaren parte diren 15.500 enpresek fakturazioa handitzea espero du, baita lanpostuak sortzea ere.