Hainbat ondorio gehiago atera du Arartekoak. Laburtuta jaso ditugu hemen:

- Herrizaingo Sailak ez digu informaziorik eman eta ez dakigu, kexak eragin dituzten gertakariak argitze aldera, kexen gaineko barruko ikerketa egin ote den. Puntu horretan ez dago inolako informaziorik (...) Horren ondorioz Herrizaingo Sailari berriro eskatu behar diogu gertakarien gaineko ikerketa sakona egin dezala, gomendioan jasotako jarraibideak aintzat hartuta eta kexetan poliziaren jardueraren zuzentasunaren inguruan agerian jarri diren zalantza guztiak argituz.

- Herrizaingo Sailak helarazi digun informazioa ez da inolaz ere nahikoa erakunde honek poliziak erabili zuen indarkeriak egokitasun, premia, zentzuzkotasun eta proportzionaltasunaren printzipioak errespetatu zituen ala ez baloratzeko. Era berean, gure ikuspuntuaren arabera, informazio hori ez da nahikoa sailak helarazi digun iritzia –printzipioak errespetatu zituela– justifikatzeko.

- Herrizaingo Sailak ez du behar bezala justifikatu indarraren erabilera babestu behar duten elementuak jazo zirela (...) Esku artean ditugun datuekin bat eginez, esan daiteke jokamolde bortitzei erantzuteko Ertzaintzak egin zuen indarkeriaren erabilera justifikatuta egon zela. Dena den, zehazteke egongo litzateke erabilitako indarrak premiaren, egokitzapenaren, arrazoizkotasunaren eta proportzionaltasunaren legezko printzipioak errespetatu ote zituen.

- (...) Esan dezakegu hainbat pertsonek, irailaren 21ean indarkeriarik erabili ez zuten pertsonen aurkako indarkerian oinarritutako poliziaren jardueren ondorioz, erakunde honetan aurkeztu dituzten kexen bidez egin dituzten salaketak arrazoituak eta justifikatuak daudela. Horregatik guztiagatik, ondorengo presuntzioa agerian jarri da: ordena publikoa mantentzeko ardura duten unitate polizialek erabili zuten indarkeria, kasu horietan, ez zen behar bezala justifikatuta egon, aipatutako premia, egokitasun, arrazoizkotasun eta proportzionaltasun printzipioen bidez.

- Deigarria da lesioen parte medikoen kopuru handia, baita Ararteko erakundeak dituen kolpeen eta kontusioen froga grafikoak ere.

- (...) Legebiltzarrean egindako agerraldian, Herrizaingo Saileko sailburuak Tobogan tabernan poliziak burutu zuen jarduera hobea izan zitekeela onartu izanak pentsarazten digu jarduera hori proportzionaltasunaren printzipioaren aurkakoa izan zela, Giza Eskubideen Europako Auzitegiaren doktrinari jarraiki.

- (...) Egokia iruditzen zaigu Herrizaingo Sailak, ezartzen dituen baldintzekin, helarazi dizkiguten nahiak bideratzeko aukera aztertu dezala. Nahiek zera dute hizpide: ordezkari publikoek poliziaren operatibo jakin batzuen behatzaile gisa esku hartzeko aukera edukitzea. (...) Edonola ere, bertaratu ziren zinegotziei emandako tratua jarduera desegoki eta oker gisa kalifikatu beharra dugu, bereziki, bideo-grabazio batek egiaztatu duenaren arabera, zinegotzi batek jaso zituen bultzadak.