Kofi Annanek utzi egingo du NBEren Siriarako mandatari berezi kargua
"Gatazkaren militarizazioagatik eta nazioartearen batasun ezagatik" Kofi Annanek utzi egingo du NBEren eta Arabiar Ligaren Siriarako mandatari berezi kargua.
Mandatari bereziak sei oinarriko bake plan bat prestatu zuen Siriako egoera konpontzeko asmoz, horretarako nazioarteko harremanetarako talde bat sortuz. Baina bere planak eragin positiborik ez duela ikusita etsi egin du. Abuztuaren 31n utziko du kargua.
Annanek azaldu du ezinezkoa dela Siriako Gobernua eta oposizioa prozesu politiko bat hasteko pausoak eman ditzaten konbentzitzea. Eta erantzule nagusitzat NBEren Segurtasun Kontseiluko bost kide iraunkor jo ditu. Gaineratu du Siriako herriak urratsak eman behar dituela, "elkar seinalatzen" eta "iraintzen" aritu beharrean.
Ban Ki Moon NBEko idazkari nagusiak "esker onak" eman dizkio Annani eta "zorretan" dagoela esan du azken hilabeteetan lortu duen guztiagatik. Gaineratu du ordezkoaren bila diharduela.
Kazetaritza independentea eta profesionala egiten dugu, euskaraz eta euskaldunontzat.