PPko kide bat Balear uharteetan alderditik kanporatu dute katalana defendatzeagatik
Balear uharteetako Manacor herriko alkatea, PPko Antoni Pastor, alderditik kaleratu dute uharteetako PPko presidente José Ramón Bauzáren politikari aurka egin eta parlamentuan katalanaren alde bozkatzeagatik.
Balear uharteetako PPko eskubide eta bermeen batzordeak kanporatu du Pastor alderditik eta parlamentuan bozka diziplina lau aldiz hautsi izana leporatu dio. Pastor lehen ere zigortua izan zen bozka diziplina hausteagatik. Alderdiak gaineratu du erabakia "alderdiko estatutuak kontuan hartuta" hartu dutela.
Manacorreko alkateak, berriz, dio oraindik ez duela PPren komunikatu ofizialik jaso. Alderdiak dio aldiz, Pastorri jakinarazi diotela erabakia eta honek hamabost eguneko epea duela batzorde espainiarrari errekurtso bat aurkezteko.
"Espero dut ez kaleratzea, baina ez dakit zer gerta daitekeen", dio Pastorrek VilaWebi emandako elkarrizketan. Gaineratu du bere ustez hizkuntza bat lurralde baten "identitatea" dela eta ezin dela "arriskuan" jarri. Hizkuntza eta identitatea alderdi politiko baten gainetik daudela dio Pastorrek eta horregatik alderdiko aginduak "alde batera utzi" eta "bere kontzientziarekin" bozkatu duela.
Kazetaritza independentea eta profesionala egiten dugu, euskaraz eta euskaldunontzat.