Kaskagorri eta Txori Barrote konpartsei Bilboko Udalak ezarritako zigorra baliogabetu dute
2009an, bi urtez txosna jartzeko debekua ezarri zien Bilboko Udalak Kaskagorri eta Txori Barrote konpartsei, euren txosnetan euskal presoen argazkiak erakusteagatik. Hiru urte geroago, Konpartsen Federazioak jarritako helegitea onartuta, EAEko Justizia Auzitegi Nagusiak zigorra baliogabetu du, Udalaren barne araudiak ez duelako ustezko arau-haustea jasotzen.
Ebazpenak ez du berehalako ondoriorik, bi konpartsei ezarritako zigorrak epea bete duelako jada. Dena den, konpartsetako kideek adierazi dute epai garrantzitsua dela, agerian utzi duelako Udalak ez zuela zigorra ezartzeko eskumenik.
Iñaki Azkuna (EAJ) buru zuen udal gobernua Ertzaintzaren txostenetan oinarritu zen zigorra ezartzeko.
Kazetaritza independentea eta profesionala egiten dugu, euskaraz eta euskaldunontzat.