Israeli ia 4 milioi euroko kalte-ordaina eskatuko diote Askatasunaren Ontzidiaren kontrako erasoan hildakoen senide batzuek
2010eko maiatzaren 31n, Israelgo soldaduek eraso egin zioten Gazara laguntza humanitarioa ematera zihoan Askatasunaren Ontzidiari. Mavi Marmara ontzian zihoazen bederatzi lagun hil zituen Israelek operazio hartan. Hildako hiru lagunen senideek iragarri dute bost milioi dolarreko (3,8 milioi euro) kalte-ordaina eskatuko diotela Israeli.
Furkan Dogan, Cevdet Kiliçlar eta Necdet Yildirim ekintzaile turkiarren senideak dira kalte-ordaina eskatu dutenak. Hildakoez gain, Mavi Marmara ontziak jasan zuen erasoan zauritu zituzten hainbat lagunek ere bat egin dute eskaerarekin.
Israelen eta Turkiaren areteko harremanak asko okertu ziren ekintza militarraren ondorioz. Turkiak formalki auziperatu zituen Israelgo Defentsa Indarretako hainbat kide, erasoan parte hartu zutelako eta bederatziri bizi osorako kartzela zigorra ezarri zien, nahiz eta epaiketa in absentia egin zenez, inoiz ez duten kondena bete.
Erasoari buruzko irudiak mundu osoan zabaldu ziren, Israel haiek bahitzen saiatu zen arren. Besteak beste, ontzian zegoen Lara Lee zuzendariaren ordubeteko bideo honek erakusten du soldaduen erasoa nola gertatu zen.
Kazetaritza independentea eta profesionala egiten dugu, euskaraz eta euskaldunontzat.