Herbehereetan autopistetako argiak itzaliko dituzte elektrizitatea aurrezteko
1.640 milioi euro aurreztu behar ditu Herbehereetako Garraio Ministerioak 2020. urtea bitartean. Murrizketa gogor horri aurre egiteko neurri ezohikoak hartzen hasi da, besteak beste, autopistetako argiak itzaltzea, baita trafiko gutxi duten errepideetakoak ere.
Autopistak ilunpetan egongo dira 23:00etatik 05:00ak arte eta trafiko gutxiko errepideetan berriz, 21:00etan itzaliko dituzte bonbillak. Urrian Zeelandako probintzian jarriko da indarrean neurria eta 2013tik aurrera iritsiko da gainontzeko probintzietara.
Argindarra aurreztearekin batera, Herbehereetan gutxiago zainduko dituzte errepideetako erdibitzaileetako landareak eta bideko lanak iragartzeko afixa elektronikoak erabiltzeari utziko diote.
Ez da horrelako neurriak hartu diren aurreneko Europako herrialdea. Herbehereetatik nahiko gertu, Flandrian, errepideetako argien erdiak itzali zituzten iaz.
Kazetaritza independentea eta profesionala egiten dugu, euskaraz eta euskaldunontzat.