Greenpeacen protesta erraustegiaren kontra.

Gipuzkoako hondakinak errauste planta baten bidez kudeatzearen inguruan azken urteotan sortutako gatazka fase berri batean sartu da egun hauetan. Bi mugimendu nagusi gertatu dira instituzioetan: Bata Batzar Nagusietan; eta bestea, udaletan, mankomunitateetan eta Gipuzkoako Hondakinak partzuergoan gertatu da.

Alde batetik, Batzar Nagusietan, Diputazioan agintean dagoen Bilduk -bere programan errauskailuarentzako moratoria defenditu duenak- aurrekontuak beste inoren laguntzarik gabe onartzeko gutxiengoan dagoenez, EAJrekin lortu du igandean hitzartzea aurrekontuok. Hondakinena baino eremu zabalagoa hartzen du bi alderdion arteko hitzarmenak, seguruenik hurrengo hauteskundeen ondorengo Eusko Legebiltzarrarekin ere zerikusia izan lezakeena; Gipuzkoako errauskailuaren gaian, gaia ingurumen batzordean 2012ko ekainera bitartean aztertzea adostu dute.

Eta bestetik, udaletan, mankomunitateetan eta Gipuzkoako Hondakinak partzuergoan gertatu da mugimendua, eta horren xehetasun batzuk prentsaurrean Juan Carlos Alduntzin diputatuak -Partzuergoko presidente ere badenak- eman ditu. Adierazi duenez, Gipuzkoako biztanleen %60 biltzen dituzten 39 udaletako alkateek eta mankomunitate bateko presidenteak Partzuergoari jakinarazi diote beren hondakinak orain artekoa baino modu askoz selektiboagoan bildu eta kudeatzeko asmoa dutela. Alduntzinek garbi utzi du hiri hondakinen kudeaketa udalei, mankomunitateei eta partzuergoari dagokokiela, eta ez Batzar nagusiei. Ondorioz, Partzuergoko zuzendaritzak batzar orokorrari proposatuko dio errauskailua eraikitzeko obrak sei hilabetez etetea, tarte hori baliatuz hondakinen kudeaketa eraginkorraren inguruan kontsentsu ahalik eta zabalena lortzeko.

ARGIAk bere iturrietatik jakin ahal izan duenez, 39 alkate horien artean badira Bilduk gehiengo osoa edukiz 2012an edo 2013an Atez Ateko bilketa ezartzea erabaki duten herrietakoak, baina baita Bilduk gehiengo sinplez agintzen duenetakoak ere, tartean Donostiakoa.

Gai honetan hurrengo hitzordu nagusia datorren ostegunekoa izan daiteke: Usurbilen Juan Carlos Alduntzinek hitzaldia emango du "Zubietako errauste plantari Moratoria: zertarako eta alternatibak" izenburua eramango duena.