Maiatzaren 7an hizkuntza gutxituei buruzko eztabaida egin zen Frantziako Asanblea Nazionalean. Lehen aldiz, hizkuntza gutxituei buruzko legea egingo dela hitz eman zuen Christine Albanel Frantziako Kultura ministroak. Bada, maiatzaren 22an, Frantziako Parlamentuak Konstituzioaren 1. artikulua aldatzea onartu zuen. Ondorengo esaldia gehituko diote: "Eskualde hizkuntzak Nazioaren ondare dira". Konstituzioak hizkuntza horiei erreferentzia egitea aurrerapausoa da, baina etorkizunean zein aldaketa ekarriko dituen ikusteko dago. Ikusteke dago, besteak beste, Frantziako erakunde batzuengan sortu duen ezinegonagatik. Frantses Hizkuntzaren Akademiak, adibidez, Konstituzioak eskualde hizkuntzei erreferentzia egitea arbuiatu du: "Bost mendez frantsesak frantziar nortasuna ondu du, eta ondorioa argi ikusten da Konstituzioko bigarren artikuluan; frantsesa da Frantziako hizkuntza bakarra". Hala ere, hizkuntza gutxituen aurka ez dagoela adierazi du Akademiak: "Hizkuntza gutxituekiko abegia eta borondate ona beste nonbait adieraz daiteke, ez Frantziako Konstituzioan".