Negretek La quinta Alemania (Bosgarren Alemania) liburuko kapitulu bat idatzi du, prekarietateari buruzkoa hain zuzen ere.

Salvador Lopez-Arnalek egin dion elkarrizketan nabarmendu du pobreen eta aberatsen arteko aldea geroz eta handiagoa dela Alemanian ere. “Zifrek diote herritarren %1ek herrialdeko aberastasunaren erdia daukala bere esku”. Gainontzekoek, Negretek dioenez, oso baldintza txarretan lan egiten dute, baita funtzio publikoan eta mundu akademikoan ere.

“Alemaniako Ikerketa Ekonomikoko Institutuak (Deutsche Institut für Wirtschaftsforschung, DIW), adibidez, txosten batean adierazi zuen alemaniarren erosketa ahalmena hilabeteko 93 euro gutxitu dela azken hamarkadan batez beste”.

Alemaniara lanera joatekotan direnentzat jakingarri gehiago: ez dago gutxieneko soldatarik. Negretek azaldu du badaudela patronalaren eta sindikatuen arteko akordioak zenbait alorretan baina baldintzak asko aldatzen direla Alemania ekialdean eta mendebaldean.

Aipatutakoak eta beste datu batzuk kontuan izanda, kazetariak uste du geroz eta zailagoa izango dela Alemanian ere modu duinean bizitzea. Pentsiodunentzat, batez ere, egoera asko larritu da: “Jasangarritasun faktorea sartu zutenetik, zeina, bide batez, Espainian ere jarri nahi duten, alemaniar askoren pentsioak murriztu egin dira. Geroz eta erretiratu gehiagok egin behar dute lan pentsioa osatzeko”.