Gipuzkoako AHTren lan guztiak abian, baina herrialdetik kanpora loturak airean
Atzo hasi ziren AHTk Gipuzkoan barrena egin behar duen bidean, hasteko falta ziren azken lanak: Hernialde-Zizurkil. Jada martxan dira, beraz, Eusko Jaurlaritzari dagozkion Gipuzkoako hamazapi zatietako lanak. Aldiz, Bizkaiko eta Arabako zatiak egitea Espainiako Gobernuari dagokio, eta murrizketek zati horien gauzatzea atzeratu dezakete. Espainiako Gobernuak gaineratu du Gasteiz eta Burgos arteko zatia ere "egoera ekonomikoaren" menpe dagoela. Bestalde, Hendaia eta Bordele arteko zatia ere kolokan dago, Jérôme Cahuzac Frantziako aurrekontu ministro delegatuak adierazi duenez.
Hernialde-Zizurkil zatiko aurreneko harria jartzean, Patxi Lopezek Espainiako Gobernuari eskatu zion Araba eta Bizkaiko zatietako obrak aurrera eramateko, Euskal Y-a 2016rako amaituta egon dadin, aurreikusita dagoen bezala. Lopezek esandokoen harira, Espainiako Gobernuak EAEn duen ordezkariorde Jose Luis Herradorrek adierazi zuen AHTa "lehentasuna" dela eta obrekin jarraitzeko "asmo osoa" dutela, baina eman beharreko aurrerapausoak murrizketen menpe daudela gaineratu zuen.
Atzo egindako ekitaldian Lopezek gogoan izan zituen "krisi garaiotan inbertsio hau egitea dirua xahutzea dela" diotenak. "Gobernatzea ez da geldiaraztea, aberastasuna eta enplegua sortzen duen hori sustatzea baizik", adierazi zuen.
Publizitatea
 |
|
||||
2369 zenbakia. Azkena || Hemeroteka
|
Babeslea
Ale berean...
Kazetaritza independentea eta profesionala egiten dugu, euskaraz eta euskaldunontzat.