ELAk ez du EH Bilduk murrizketen kontra deitutako manifestazioan parte hartuko
"Sekula ez dugu onartu, eta etorkizunean ere ez dugu onartuko, alderdi politikoek mugimendu sindikal eta sozialaren esparrua modu alderdikoiean erabiltzeko asmorik". ELAk ohar baten bidez jakinarazi du ez duela bat egiten EH Bilduk larunbaterako "Murrizketarik ez, burujabetza ekonomikoa" lelopean deitu duen manifestazioarekin.
ELAren iritziz, langile-klasean eta gizartean dagoen eta handitzen doan haserrea aintzat hartu nahi badute alderdi politikoek, "beren erakunde ardurak dituzten lekuetan bideratu beharko lituzkete ahaleginak".
"Besteak beste, esan nahiko luke erabakiak hartzerakoan benetako partaidetza ematen zaiela sindikatuei eta gizarte-erakundeei, solidaritate-politikak ahalbidetuko lituzketen zerga-erreformak onartzen direla eta Rajoyk oinarri-lege gisa definitzen duena ez dela aplikatzen". ELAk salatu duenez, Hego Euskal Herrian ez da halakorik gertatzen ari, "ezta Bilduren ardurapeko erakundeetan ere".
Alternatibak eta mobilizazioak proposatzen joango direla baieztatu dute, eta gogoratu dute beste erakunde sindikal eta sozialekin "lehen pauso gisa" mobilizazioak antolatu dituztela aste honetarako eta hauen jarraikortasuna aztertzen ari direla.
Informazio gehiago:
Euskal Herria Bilduk "kalera ateratzeko eta mobilizatzeko" deia egin zion euskal jendarteari, "defendatzeko aukera eskainiko digun gehiengo sozial eta politikoa antolatuz". Hemen deialdia bideoan.
Kazetaritza independentea eta profesionala egiten dugu, euskaraz eta euskaldunontzat.