Hamasei polizia egiptoar hil dira Gazako mugan
Egipton 16 polizia hil eta zazpi zauritu dira auto bonba baten ondorioz. Egipto eta Gaza arteko mugan izan da erasoa, Egiptoko segurtasun indarrek eta Israelgo militarrek emandako informazioaren arabera. Egiptoko telebistak aditzera eman duenez, islamistak izan dira erasotzaileak. Ondorioz Rafahko (Palestina) pasagunea itxi du Egiptok, palestinarrek oinarrizko jakiak erosteko erabiltzen zutena.
Israelgo armadak adierazi du erasotzaileek base egiptoarrean zeuden bi auto lapurtu zituztela eta Israelen sartu nahi izan zutela muga zeharkatuz. Autoetako bat Israelgo armadak suntsitu zuen hegazkinetik eraso eginez, Avital Leibovich Israelgo armadako bozeramaileak bere Twitterrean adierazi duenez. Leibovichen esanetan, istripu larriagoa ekiditea lortu zen segurtasun zerbitzuak azkar erantzun zuelako.
Israelgo armadaren bozeramaileak adierazi duenez, erasoa gertatu ostean bost gizon armaturen gorpuak aurkitu zituzten, ustezko erasotzaileenak.
Kazetaritza independentea eta profesionala egiten dugu, euskaraz eta euskaldunontzat.