EGM erakundeak ezagutarazi berri dituen datuen arebera, 2005eko apiriletik 2006ko martxora bitartean, irakurle gehien izan zuen informazio orokorreko egunkari espainiarra 20 Minutos izan zen. Doako egunkariak 2.407.000 irakurle izan zituen egunero, bigarren lekuan dagoen El Paísek baino 400.000 gehiago. Hirugarren eta laugarren postuetan doako beste bi egunkari daude, Qué (1.944.000 irakurle) eta Metro Directo (1.838.000) eta bosgarrenean, El Mundo (1.276.000). Hala ere, egunkari guztiak aintzat hartuta, Marcak ditu irakurle gehien: 2.522.000. Irratiei dagokienez, SER katea da nagusi, 4.896.000 entzulerekin. Onda Cero irratiak 1.955.000 entzule ditu eta RNEk 1.410.000. Cadena Cope irratiaren datuak ez dituzte publikatu, EGM erakundetik kanporatu baitute. Bestalde, Cuatro telebista kateak, prime time ordutegian, Tele5 eta Antena3 kateen beherakada eragin du, oraindik sharearen zatirik handiena eskuratzen duten arren.