Debagoienako kaleak erabat hutsik, industrialdeak ez hainbeste
Arrasate, Eskoriatza, Bergara, Aretxabaleta eta Oñatin ibili gara eguerdira arte. Goizeko freskuran kaleak hutsik ikustea ez da hain harritzekoa, baina orduek aurrera egin ahala, parkeak umez eta bidegorriak ibiltariz beteta baino ez ditugu aurkitu. Dendak eta tabernak itxita ia-ia erabat.
Beste kontu bat da industrialdeetako panorama. Ez da batere erraza Debagoiena bailarako enpresa andanaren egunerokoa gaurkoan zertan izan den asmatzea; atariko kotxe kopurua kontatuta? Leiho erraldoien atzeko argia piztuta edo itzalduta dagoen begiratuta?
Datu fidagarriak atzo Goienak webgunean emandakoak dira. Ondokoek greba egin dute gaur: Fagor Elektronika, Ederlan eta Automotion, JMA, Alecop, Lazpiur, Ulma Forja, Hijos de Juan de Garay, Zahor, Chinchurreta, Azbe eta Tesa.
Lanera joatea erabaki dute berriz, ondoko enpresek: Fagor Elektratresnak eta Elektragailuak, Ikerlan, Ulma Agricola, Packaging eta Polimeroak, Fagor Industrial eta Matz Erreka.
Ezin esan herrietako denda eta tabernak bezala, ia zeharo itxita zeudenik industrialdeak, baina geldialdia oso nabaria izan da. Eusko Jaurlaritzak eman duen datuaren arabera, EAEn industriaren %30 gelditu da. Debagoienan, begiratu bat emanda baino ez bada ere, ziurta daiteke portzentajea askoz ere altuagoa izan dela.
Kazetaritza independentea eta profesionala egiten dugu, euskaraz eta euskaldunontzat.