"Eliza akituta dago" dio Carlo Maria Martinik, hil aurreko azken elkarrizketan
Carlo Maria Martini, Milango artzapezpiku ohiak hil aurretik eman zuen azken elkarrizketa argitaratu du Il Corriere de la Sera egunkariak. Martini ezaguna zen bere ikuspuntu liberalagatik eta Vatikanoaren aurkako adierazpenengatik. Oraingoan ere, mundu osoan oihartzuna izan dute elkarrizketan esandakoek. Martiniren ustez elizak bere hutsegiteak onartu eta aldaketa nabarmena egin behar du, Aita Santuarekin hasiz eta gotzainekin jarraituz.
"Badakit ez dela erraza guztiak alde batera uztea, baina behintzat askeak diren eta lagun hurkoagandik gertuago dauden gizonak bilatu behar genituzke".
Elkarrizketan Martinik Europan eta Ameriketan eliza akiturik dagoela eta akitze horretatik irteteko tresna nagusia elkarrizketa dela dio. "Eliza autoritatea da oraindik ala dagoeneko hedabideetako karikatura bat besterik ez da?".
Bestetik Martini Kardinalak jainkoaren hitza eta sakramentua laguntza moduan errekuperatu behar direla dio eta ez kastigu moduan. "Indar berri bat behar duten gizonei eramaten al diegu sakramentua?" dio Martinik.
Elkarrizketa egin eta aste batzuetara, abuztuaren 31an, hil zen Martini 85 urterekin, 1979tik 2002ra Milango artzapezpiku eta 1983tik kardinal izan ondoren. Haren hil-kapera Milanen egon zen bitartean, orduko 6.000 lagunek bisitatu zuten.
Kazetaritza independentea eta profesionala egiten dugu, euskaraz eta euskaldunontzat.