Bilboko Gatazka Guneak 2006an ireki zituen ateak, 1990an sortutako Likiniano Kolektiboaren lekukoa hartuta, Zazpikaleetako Erronda kalean. Disko, liburu, fanzine eta bestelakoak saltzen zituen denda bat izateaz gain, boterearen aurkako kolektiboen bilgunea izatea zuen helburu, nahiz eta "ia hasieratik galdu zuen ildo politiko eta kolektiboa", Gatazka Guneak itxierako komunikatuan nabarmendu duenez.
"Niretzat ekintza politikoa den heinean, herri mugimenduarentzat galera baten moduan ulertzen dut, eta horrek beti sortzen dizu kezka bat", dio Juantxo Estebaranz Likinianoren sortzaileetako batek Berria egunkarian. Likinianon "hitzaldiak eta topagune ugari" egiten zirela gaineratu du Zorion Urrutia Gatazka Guneko kideak: "Hori galtzeak pena eman zigun, eta ildo hori mantentzeko sortu genuen elkarte berria". Egitura arazoek eta salmenten jaitsierak bultzatuta, ordea, ateak itxi behar izan ditu.
Bestalde, Bilboko kontrakultura mugimenduari dagokionez, Estebaranzek dio "Bilbogune eta era horretako mugimendu interesgarriak· sortu direla, eta Kukutza gaztetxea jarri du adibide gisa: "Kukutzaren itxieraren inguruko egunetan, garbi geratu zen Bilbon badela sare indartsu bat, behar denean indarrak batzeko gai dena".
