Bakearen Nobel Saria Europar Batasunari eman diote, honen unerik baxuenean
Historian oinarritutako arrazoiketa batean, "bakearen eta adiskidetzearen alde egin duen lanagatik", Europar Batasunari eman diote Bakearen Nobel Saria.
II. Mundu Gerraren ondoren Europa berreraikitzeko egindako lana nabarmendu du Batzordeak, baita Berlingo harresia erori ostean Ekialdeko herrialdeetan "demokrazia eta egonkortasuna" zabaltzea lortu izana ere. Batasunaren ezegonkortasun ekonomiko eta politikoa ez du kontutan hartu epaimahaiak.
Saria iragartzean, Nobel batzordeko buru Thorbjoern Jaglandek hitz batzuk eskaini dizkie EBren egungo finantza eta arazo sozialei. Hala ere, adierazi du, sei hamarkadatan "bakea eta berradiskidetasuna, demokrazia eta giza eskubideak" sendotu eta lantzea saritu nahi izan dutela.
Sariaren erreakzio gisa, Europar Batzordeko presidente Jose Maunel Durao Barrosok Twitter bidez adierazi du: "Europa Batasun osoarentzat ohore handia da, 500 milioi herritar guztientzat, 2012ko Bakearen Nobel Saria jasotzea". Mezuari erantzunez, hainbat herritarrek ezetz adierazi diote.
Sare sozialetan saria kritikatu dute hainbatek, batez ere, Bosniako gudan ezer egin ez izana edo egun hartzen ari den murrizketa sozialen hautua salatuz.
Kazetaritza independentea eta profesionala egiten dugu, euskaraz eta euskaldunontzat.